黃浩然兩子染流感全家戴罩瞓覺

黃浩然昨日到電台宣傳主演的無綫劇《平安谷之詭谷傳說》，作為廿四孝爸爸的浩然面對流感肆虐，他都不敢鬆懈：「我啲仔中晒招，有一個禮拜冇返學，但依家已經好番晒。」

憂交叉感染

他懷疑細仔是在學校感染流感：「佢間學校有同學仔病先，然後細佬就中招，開始食藥時，哥哥又有症狀，好彩我同太太冇事，喺屋企我哋除咗食飯，都戴住口罩，大家都要保護自己。（瞓覺都戴？）係呀，全家戴晒口罩瞓，抖氣係會有啲辛苦，但一定要咁做，因為兩兄弟瞓喺隔籬床，好驚佢哋會互相傳染，如果輪流再病嘅話就有排搞。」

女人戲有發揮

談到熱播中的劇集《平》，黃浩然表示角色比想像中更有發揮：「雖然係女人戲，但係我個角色對住阿爹、村民同老婆嘅時候都要有唔同變化，發揮都幾大。」他更預告「好戲在後頭」，他說：「後段仲有個高潮位，我個角色嘅主力喺後面，希望大家會鍾意。」

黃浩然透露兩個寶貝仔輪流病，要求家人全天候戴口罩。

向來有操肌的黃浩然夠晒大隻，未有被囝囝傳染流感。

手頭上的劇集工作告一段落，黃浩然表示現階段主力陪屋企人：「仲有啲廣告工作，之前已經陪咗小朋友去旅行，因為過年之後要考試，所以過年會留喺香港同屋企人過。」

文：音樂組