黃子華自爆黑面史靠佘詩曼撻番着
黃子華與佘詩曼（阿佘）近日為主演的賀歲片《棟篤特工》宣傳，日前齊齊「出海」受訪。二人自電視劇《絕代商驕》相隔9年再合作，子華大讚阿佘由電視台姐仔變得有巨星Feel，又自爆當年拍劇是「黑面神」，靠阿佘當「心靈雞湯」撻番着：「嗰時拍電視劇唔夠瞓，我成日黑口黑面，見到阿佘笑晒咁返工，真係好大動力。」
嘆神多過人
阿佘即說：「你都好慷慨，以前、依家都成日請食飯。你依家都由『人』變『神』，一樣咁有型！」子華聞言即笑說：「真係笑話，依家世代『神』多過『人』呀，多個唔多囉，但如果真係嘅話，我想做『二郎神』多啲。」
《棟》片由籌拍至上映足足兩年，子華承認故事由構思至今已面目全非：「多謝阿佘肯等我咁耐，成班幕後冇工開兩年都肯繼續同我癲，如果今次成功，好希望佢哋有應得嘅嘢。」子華又分享拍攝時最難忘的事：「有場戲講我哋班人去到後現代地府，拍嘅時候突然有班人衝出嚟，話我哋拍緊條橋係佢哋起嘅。（好驚？）冇嘢，我咪尊重佢好似尊重佢條橋一樣。」
巨星撈串星
戲中的「串星」計有許冠文、楊千嬅、張智霖等，分量十足，子華揚言冇碌過人情卡：「點敢叫許冠文開場亮一亮相、千嬅過一過鏡呀？我將構思講出嚟，係電影公司搵人嘅，當然佢哋嘅出現拯救咗我，真係好多謝呢班朋友。」
黃子華化妝：Judy Cheung
髮型：Helen Wong@Fifth Salon
佘詩曼化妝：江中平
髮型：Seiko Sin@Hair Culture
文：影視組