胡鴻鈞讚馬國明豁達 心中「封帝」
《萬千星輝頒獎典禮2017》雖然已圓滿落幕，但外間非常肉緊馬國明失落視帝及林淑敏失落女配角獎，不過二人分別獲胡鴻鈞及陳敏之力撐，前者更揚言一直視馬國明為心目中的視帝，非常窩心。
歌手胡鴻鈞、譚嘉儀、王灝兒（JW）及鍾舒漫等昨日出席無綫籌款節目《慈善星輝仁濟夜》記者會，剛於頒獎禮獲得「最受歡迎劇集歌曲」獎的胡鴻鈞，透露頒獎禮後一直忙不停，仍未有時間慶祝。
恨拍續集
對於馬國明未能憑劇集《降魔的》封視帝，有份演出該劇的胡鴻鈞坦言一早視對方為心目中的視帝：「佢個人好豁達，覺得有獎係鼓勵，冇都會繼續努力，當晚見佢好開心同享受。（開續集？）未知，但大家想繼續落去，希望可以成事，我都期待，會排除萬難度個期出嚟拍。」
陳敏之提升演技爭后
至於賽前被視為「最佳女配角」大熱的林淑敏，最終被朱晨麗爆冷揮低，不少網友戥她不值，有人更於淑敏的社交平台留言：「大小姐先係最佳女配角。」、「大小姐，加油呀！」、「快啲出Warning letter畀公司。」許家傑亦上載合照，力挺淑敏為心目中的最佳女配角。同樣失落該獎的陳敏之，昨日出席活動時力挺淑敏，她說：「我哋互相睇好對方，呢個獎我拎過，今次拎唔到都冇失望，覺得應該畀未拎過嘅人，我向『視后』方向努力提升演技，亦會祝福朱晨麗得獎。」
文：影視組