袁詠儀帶仔放電餵貓魔童危爬滑梯
袁詠儀日前帶兒子張慕童（魔童）去赤柱遊樂場「放電」，活潑好動的魔童，除了經常紮紮跳之外，身手亦相當敏捷，當日他去到遊樂場爬完繩索再玩滑梯，從離地約2米的管狀滑梯，像猴子般沿着滑梯外圍向上爬，相當驚險，靚靚則站在遠處全程(目及)實！
恩愛夫妻張智霖與袁詠儀的兒子張慕童已11歲，愈大愈長得似媽咪，十足餅印！好動的魔童最近學識玩滑板，不時把自己踩板的精彩片段分享到社交網。
母子玩自拍
日前下午5時許，靚靚湊完魔童放學，再帶他去赤柱遊樂場「放電」。趁住日落時段，靚靚拿出手機同囝囝Selfie，不過魔童似乎唔多合作，不時四圍望，靚靚就耐心地等囝囝望向鏡頭。自拍完一輪，愛心爆棚的靚靚拖住囝囝行去便利店買了一盒鮮奶，然後拎住盒奶去附近餵流浪貓，兩母子踎低睇住貓仔舔了幾啖鮮奶便靜悄悄地離開，餵完貓仔的魔童心情大好，沿途紮紮跳冇時停，精力無限。
靚靚(目及)到實
其後靚靚帶囝囝到遊樂場玩樂，魔童第一時間走去爬繩索，再去玩滑梯，魔童瀡完滑梯，竟然從離地約2米的管狀滑梯外圍，危險地從底部爬上頂，而靚靚則站在遠處(目及)住囝囝。魔童放完電，靚靚便拖住他離去，兩母子邊行邊傾，相當溫馨！
文、攝：追蹤組