周慧敏棄百萬歌酬回饋Fans
有「玉女掌門人」之稱的周慧敏（Vivian）將於1月26至29日在紅館舉行《一萬天荒愛未老．周慧敏30週年演唱會》，連月來為個唱準備的她，昨日在排舞室綵排，又跳又唱《自作多情》。現場見她身形明顯消瘦，Vivian說：「依家得101磅幾，之前有107磅，都瘦咗6磅，唔再瘦落去喇！去年11月已經開始排舞，自己跳舞比較機械人Feel，需要比正常嘅早少少去排練。（返屋企再練？）唔喇，要熄機Feel！」
「義工」古巨基安排性感戰衣
為今次30周年演唱會，Vivian全情投入，自爆連歌酬都不要！以她現時身價計，四場演出至少袋百萬歌酬，對此她笑說：「冇計過！完全投資番落製作度，係自己想咁做，因每樣科技嘅嘢都需要Budget。（咁咪『白做』？）唔覺得！趁我仲有呢個動力，好想為咁多年支持我嘅朋友好好做一場。基仔（演唱會總監古巨基）都係義工，捱通頂幫我。（佢出晒鬚根？）我真係對佢唔住，我惟有對佢老婆好啲。」
提到歌衫造型，Vivian透露基仔都有份構思：「本來我好安心，點知佢對我幾大期望，畀啲幾難着嘅衫我，有性感嘅！（基仔話一定有宮廷裝，係集體回憶？）咁一陣睇先知。（老公過目？）佢知係基仔搞，冇意見，咁上台都要有突破嘅！」
文：音樂組
攝：李柏儒