廖碧兒車震羅嘉良 飲酒壯膽
藝人羅嘉良、羅仲謙、廖碧兒及蘇麗珊等昨日到尖沙咀出席無綫劇集《無間道》記者會，演奸角的羅嘉良表示在無綫劇中未試過演黑幫，今次覺得很好玩：「好型！日日都戴黑超，過足癮！」去年底，他因沒有獲邀出席台慶受到冷待而掀起風波，他表示無綫高層余詠珊之後有聯絡其經理人：「佢有講唔好意思，話係誤會。（消咗啖氣未？）其實冇乜氣，只係當時有人問我，我照實講。（余詠珊有冇邀請你再返嚟？）都有，不過嚟緊星期日個頒獎禮我出席唔到，因為要返大陸拍戲，拍到二月。（會唔會再同TVB拍劇？）都會，有好劇本同啱時間都可以。」
拍咗幾日就錫
羅嘉良又讚羅仲謙掌握角色出色，只是遺憾較少時間飲酒，謙仔笑言對方有教他飲兩杯令身體放鬆，但自己不算飲得，問到對住偶像有否NG？謙仔說：「難得同欣賞嘅人合作，我係有鬥心想做好啲多過驚。」
至於廖碧兒表示開拍不久就要跟羅嘉良拍親密車震戲，非常緊張：「我喺TVB咁耐都冇乜拍過親熱戲，只係錫過馬國明一次，今次拍咗幾日就要同羅嘉良錫，佢知我鍾意洋酒，就用飲酒打開話題，我喺拍之前都有飲兩杯壯膽，當時好多攝影機對住，車廂又窄，我有啲緊張！（咀戲一Take過？）一個好長嘅Take，當時我好熱！」
文：影視組