恭喜Stephy封后？傅穎超尷尬：唔會啦！
近年北上發展的藝人傅穎昨日現身香港拍廣告，提到傳不和的鄧麗欣首獲封影后，她尷尬表示不會致電恭賀對方，有緣分的話遲早會見面，更自爆去年已甩拖回復單身！
久未在香港露面的藝人傅穎（Theresa）昨日現身，與樂隊Supper Moment為戶外服裝品牌拍廣告。露腿的Theresa透露上次在香港工作搵錢已是2016年，去年就忙於在內地拍劇。談到傳不和的前Cookies隊友鄧麗欣（Stephy）在《第二十四屆香港電影評論學會大獎》獲頒「最佳女演員」，她表示：「係咩？好好呀，好開心，對演員嚟講係好希望得到大家認同，恭喜佢。」問到可會親自打電話恭喜對方？她尷尬笑言：「唔會啦，好耐冇打，你哋幫我寫咪得，大家各自安好。（唔想同姊妹重修舊好？）唔好咁特登，有緣分嘅話遲早都會見面。」她又透露今年會中港兩邊走工作，出書就留待明年，問到可會寫關於姊妹的事情？她笑言：「你又嚟？唔寫姊妹我都係幾有故事嘅人，可以寫好多嘢。」
自爆舊年甩拖
講到今次拍廣告，Theresa透露酬勞非常好，並自言很喜歡做運動，問到平時可會與男朋友做運動？她自爆去年已跟內地男友分手：「我依家單身，唔係最近嘅事，隔咗一段時間，我哋係和平分手，因為冇乜機會見面，性格都係問題，依家係朋友。」問到新一年可想有新戀情？她指想專注工作，現時不是特別想拍拖，但講到身邊很多姊妹已結婚，她表示很戥她們開心，問到可有酸溜溜？她笑言：「點會，開心都嚟唔切！我冇所謂，有就有，冇就冇，有嘅話擋都擋唔住。」
至於出爐影后Stephy，昨日凌晨在社交網上載與朋友慶祝的照片，透露明明已回了家，但一班朋友很有心，叫她出來吃飯，令她很感動。
文：音樂組