汪明荃辛勞命要秋官帶挈
「鑽石組合」汪明荃與鄭少秋（秋官）昨日出席賽馬會「農曆新年賽馬日」記者會，並於大年初三在馬場同台獻唱，秋官表示與汪明荃合作永遠都開心：「我哋係鑽石組合，甩唔到！」汪明荃反問對方：「你想飛我咩？」秋官即笑說：「我黐實你！」汪明荃表示兩人以往新年都會一齊唱歌，但為賽馬會同台演出則是首次。
夾錢落注試運氣
提到兩人在外地不時有合作，汪明荃即叫秋官快點帶挈她，秋官笑言：「千祈唔好咁講，阿姐好犀利得到博士，有輝煌歷史，榮耀係無價。」又大讚汪明荃很有精力，任何事都做得到。但汪明荃卻自嘲辛勞命，至今仍屹立不倒屬好運，秋官續說：「我冇咁叻！我依家有老婆啦。」汪明荃遂取笑對方：「（有老婆打點一切）會長命啲，唔使煩咁多嘢。」秋官聞言：「呢啲權力凌駕一切。」
汪明荃又預告兩人將於今年再合作開演唱會：「睇老闆點，去年各自都有開騷，如果紅館趕唔切就去西九。」秋官又指初三當日會夾錢試運氣：「唔買唔知運氣好，沾吓旺氣就更好。」
欣宜負傷影海報
此外，秋官女兒鄭欣宜（Joyce）早前受腳傷，將於4月舉行首個紅館騷《BREAK a LEG 鄭欣宜演唱會2018》的她，幽默地以腳傷為題，演唱會海報亦以左腳打上石膏的造型上陣，甚有心思。
文：名人組