衛蘭肉騰騰食埋妹妹嗰份

歌手衛蘭一連三場演唱會《Oh My Janice World Tour 2018》前晚開鑼，開騷前幾日Janice病倒，仍然落力獻唱。個唱中段，Janice換上黑色造型唱出《大哥》時，組合at17由台下升上來驚喜現身跟Janice合唱。

at17讚謙虛勤力

之後，林二汶憶起為何當年留意到Janice：「事緣2005年at17開騷，喺opening嘅時候，見到有個女仔好緊張、好狼狽咁着住高踭鞋收工趕嚟，多謝Janice。」盧凱彤更大讚對方多年來非常謙虛勤力，今次的演唱會沒有設歌詞機，因為Janice全部背熟歌詞！

衛蘭坐着半天吊的「樹藤車」出場，極具氣勢！

組合at17與衛蘭提起往事，忍不住大笑。

之後，穿上裸色裙的Janice坐在半空吊着的「樹藤車」出場，一向不擅長說話的她，直言透過音樂和畫畫去表達自己，並自爆兩年前脊椎側彎要重新學行路：「咁大個人要重新學行路唔係容易嘅事，同我嘅音樂路都好相似，呢兩年我先表達多啲自己，以前成日收埋自己。其實呢個係我脆弱嘅一面，好少喺咁大嘅場合公開同大家分享。」隨即用鋼琴自彈自唱《Make You Feel My Love》及黎明的《情深說話未曾講》。

衛蘭（左）、衛詩姊妹倆溫馨咀嘴。

Janice到台側跟歌迷握手。

肥10磅爆糗事

而開騷前預告不會減肥的Janice，跟着自爆增肥10磅，她說：「上一次演唱會我減咗10磅，但今次我增咗10磅！」到尾聲時，妹妹衛詩（Jill）出場與Janice合唱，姊妹兩人更咀嘴兼大講過往的經歷，Janice搞笑說：「16歲嗰時買咗高踭鞋，妹妹偷偷地着咗，着到爛晒我都冇嬲佢。」Jill即抵死說：「你有啊！你個樣好嬲，我細個都好怕肥，所以我成日都唔肯食飯，但家姐佢會食埋我嗰份！」令全場爆笑。到Encore部分，Janice到台兩側跟歌迷握手作近距離接觸，並唱出《離家出走》及《就算世界無童話》為演唱會畫上圓滿句號。

文：音樂組

攝：鄭家俊