拉丁天王Ricky Martin與拍拖兩年的瑞典畫家男友Jwan Yosef，原來早前已秘密結婚，Ricky公告喜訊時，以「我男人」來形容另一半，認真夠晒Sweet！
現年46歲的Ricky日前接受訪問時透露，有意與33歲的男友Jwan籌備婚禮，但原來只是煙幕，他其後接受《E!News》訪問，驚爆早已與Jwan秘密拉埋天窗！Ricky表示：「我已經係個丈夫，但我哋嚟緊幾個月後會大搞一場派對。我哋已經許下承諾，宣誓晒所有嘢，又簽晒所有應該簽嘅嘢，例如婚前協議同其他……感覺真係好正！我唔可以同人介紹佢係我未婚夫，我真係做唔到，因為佢係我老公，佢係我男人！」
兩人透過社交網站Instagram認識，於2016年1月開始拍拖，同年9月訂婚，並一起養育Ricky的9歲孖仔Matteo與Valentino。日前他們一家四口登上家居設計雜誌《Architectural Digest》的封面，並展示其洛杉磯的大宅。Ricky表示：「實在有好多空間，可以為我哋家庭去營造一個有生氣、有創意嘅環境。你永遠唔會知道未來會帶咩畀你，但我好熱切期待。」
此外，Ricky亦登上同志雜誌《OUT》封面，被問到為何會讓一對兒子曝光？是想令人明白同性戀者也可以組織正常的家庭嗎？他解釋：「好多人同我講：『喂，你兩個仔上晒雜誌封面喎。』我就話：『係呀，因為我想正常化件事，想大家見到我嘅家庭照時，會覺得都冇咩問題呀。』呢個係我嘅目標。」
文：外娛組