美國名嘴奧普拉（Oprah Winfrey）日前於金球獎獲成就獎時所發表的反性侵行為演說，激勵人心令網民Like爆，推舉她選2020年美國總統。不過，英國著名男歌手Seal似乎唔多Buy，前日在社交網貼相留言狠批奧普拉一直知道淫監製Harvey Weinstein性侵女星的惡行，鬧她是幫兇！
現年54歲的Seal前日在Instagram留言寸奧普拉一早知道Harvey惡行：「噢，我唔記得咗，冇錯……你聽過傳聞，但你（奧普拉）完全唔知佢（Harvey）其實一直侵犯緊年輕女星，亦唔知佢哋身處緊乜嘢境況，係我嘅問題。 #道貌岸然荷里活。」又貼上奧普拉親吻Harvey、與女歌手Rita Ora及Harvey交談的舊相，並寫道：「當你（奧普拉）數十年嚟都係部分問題嘅元兇，但突然間大家都覺得你先可以解決問題。」狠批奧普拉的行為虛偽！
Seal公開批評奧普拉後，立即惹來網民大量「負皮」，有網民留言叫他收口：「你嘅工作就係唱《Kiss From A Rose》（Seal的《蝙蝠俠》名曲），收口！」亦有網民說：「因為男人嘅罪行而去怪責女人，好野蠻啫！」更有網民拉埋Seal前妻Heidi Klum落水，問他點解唔轉移視線批評曾與Harvey合作多年的Heidi：「你幾時留言講Heidi Klum？佢都同嗰個男人（Harvey）超級親密喎！」
另方面，出爐金球影帝占士法蘭高（James Franco），獲獎後被合作話劇的女星Ally Sheedy在社交網指控性侵，占士日前現身名嘴Stephen Colbert的節目時首度回應，否認Ally的指控：「首先，我唔知我對Ally Sheedy做過乜，我同佢合作時相處愉快，亦完全尊重佢，唔知點解佢咁唔開心。佢依家已經刪除咗段留言，我唔知啦，我唔能夠代表佢講嘢。」
文：外娛組