克勤阿Lam晒「二奶」歎早餐

剛「入五」的李克勤早前從英國訂購了一部跟他同齡的古董甲蟲車，他知道林子祥（阿Lam）同樣有部黑色古董甲蟲車，上星期他們在廣州一個節目中巧遇，克勤即在社交網上載合照，留言：「跟鬍鬚佬約好下個星期食個早餐，兩人揸部甲蟲出來影相。」克勤坐言起行，昨晨果然與阿Lam履行「甲蟲早餐」之約。

網購英國筍貨

愛砌Lego的克勤早前親手砌了一架甲蟲車，昨日他接受電話訪問時說：「我知道阿Lam有架古董開篷甲蟲車，自己恨咗好耐，前年終於上網喺英國訂咗一部，架車舊年3月到港，但搞咗9個月先揸得出街。上星期見到阿Lam，佢問我架車落地未，我哋咪約咗今朝7點揸出嚟影張靚相，阿Lam一向都早起，我就送完仔返學，跟住兩條麻甩佬出嚟約會食個早餐。」

李克勤買得心頭好，又要落足嘴頭氹盧淑儀畀佢買「波子」了。	超級「靚女」！！	網購的古董甲蟲車「開箱」喇！

克勤表示阿Lam的古董車比他那部「細10歲」，他說：「我嗰架車係1968年。」又指阿Lam是玩古董車專家，除了甲蟲車，在美國還有其他古董車，記者笑他們帶「二奶」出來約會，克勤笑說：「呢兩個字好敏感，係我哋心頭好！」他笑言自己盲舂舂買得這部古董車：「好好彩，架車本身係喺英國一個展覽度，性能好好，以50年車齡嚟計佢行得好少，仲係半自動波，呢個世界算係冇乜喇，九成幾嘅零件都唔使換。」

又吼古董波子

克勤續指另一部「Dream Car」是古董保時捷，他笑說：「阿Lam喺美國都有一部，但好貴。（搵個藉口送畀自己慶祝生日囉？）好呀！下個生日。（叫太太盧淑儀送畀你？）唔得，咁我要買番好多手袋、鑽石戒指畀佢，依家要開始做定工夫先掂。」

文：音樂組