余香凝見Fiona變癡漢硬晒軚
藝人余香凝、李綺雯、邵音音和太子珠寶鐘錶主席鄧鉅明等，前晚在尖沙咀出席慈善首映。受訪時，余香凝興奮地表示服裝是薛凱琪（Fiona）所贈：「其實我好細個就鍾意佢，好鍾意扮佢講嘢，好多人話我唱歌把聲有啲似。（度過條頸差唔多？）我都覺得自己條頸幾長！」又笑言自己見到Fiona會癡漢上身，全身僵硬！
李綺雯則笑稱以為現場有小鮮肉睇，又自稱Dry爆：「年幾兩年冇拍拖喇！（鍾意小鮮肉多過成熟型？）兩樣都鍾意！最緊要有肉食！」至於鄧鉅明透露不時陪太太入場睇戲：「唔係靜雞雞o架，我哋好公開！」
