教堂追思彌撒張衞健痛別胞弟

患有抑鬱症、肝病及腎病的Henry，日前倒斃在寓所浴室，由於事出突然，Dicky受訪時亦表示難以接受。其家人昨晚在教堂進行追思儀式，Dicky太太張茜及胞弟張衞基與親友先行到場。問到Dicky的心情是否已平復，張茜只回答：「Dicky一陣間就嚟。」而Dicky媽媽則由兒子張衞基陪同下進入教堂，只見她神情哀傷。大約7時半，戴上黑色冷帽的Dicky以一身素服現身，見他一臉愁容，記者上前訪問時，他只說：「一陣先。」而Dicky前經理人趙雪英、好友蘇永康夫婦、許志安、蔡立兒及丈夫歐陽德勛等，40多人先後到達，眾人均未有受訪。

未知暈倒原因

儀式進行了個半小時後完畢，Dicky、太太張茜、張衞基搭住張媽媽膊頭，還有一班好友、親人等陸續落樓。Dicky獨自上私家車，而張茜和張母等則坐另一架七人車離開。再問Dicky是否心情已平復？他說：「係呀，感謝主畀咗好多力量屋企人，尤其畀咗媽咪好多勇氣，一個好豁達嘅心去面對Henry嘅事。再重申一次，警察喺現場嘅初步搜證結果顯示，相信Henry係沖緊涼時暈倒跣親，太詳細嘅就唔知。（跟隱疾有關？）心臟呀，或者中風，我哋都唔知道，同屋企人商量吓會唔會作進一步嘅化驗。（之前知唔知佢呢個病？）唔知。（上次見係幾時？）差唔多啦，唔該晒。」

雙手合十的張茜為追思會細節打點。	張衞彝日前倒斃於寓所浴室，終年50歲。	任警司的張衞基沿途安慰媽媽。

葬於天主教墳場

Dicky又多謝天主教香港教區副主教陳志明神父昨晚的幫助，因神父在家人最徬徨的時候，主動伸出溫暖援手，當家人搵不到一個理想的靈堂時，神父就為其家人安排聖約瑟堂，並主動提出親自幫Henry主持彌撒及盡量安排將Henry的骨灰安放在天主教墳場。

文：音樂組