王浩信四出拉票嗌怕醜
視帝大熱人選王浩信昨日為新劇開工，直認一向視最佳男主角獎項為夢想，自爆叫埋老婆同阿女四出拉票，恨獎恨出面！而打到啪啪聲的伍允龍則表示，老友安志杰經常鼓勵他盡快拍拖結婚兼生B：「我都真係渴望有伴侶！」
藝人王浩信、伍允龍（Philip）、楊明與江嘉敏等，昨日在旺角一間酒店為無綫新劇《兄弟》開工，飾演警察的Philip「伍四腳」上身，向黑人拳手啪啪聲連踢四腳！
訪問時，提到浩信是台慶頒獎禮的視帝大熱，明顯恨拎獎的他自爆仍要四出拉票：「但其實會好怕醜，因為鍾意你就會睇咗套劇。（叫老婆陳自瑤幫你拉票？）會，同叫晒身邊嘅人、阿女嘅同學。（叫個女亮相？）佢亮咗好多次啦！」他坦言一直視「視帝」為夢想：「過去一年都辛苦，所以要為自己嘅努力負責，盡力拉票，等大家記得番我個角色。」至於江嘉敏則表示從浩信這位前輩身上學習到不少，所以會為對方落力拉票。
伍允龍呻肥咗
至於Philip稍後到菲律賓拍外景時要剝衫演出，他笑言最近跟好友安志杰、Jessica C.夫婦食到肥晒：「感謝主，仲未合體變成一舊，不過呢啲真係練得耐，合得好快，聽日會開始節食！」談及Jessica再佗B，他坦言一早知道，又笑指安志杰常鼓勵他盡快拍拖結婚生仔：「都真係渴望有個伴侶，但唔心急得，要小心選擇！」
文：影視組