阮兆祥怕「夜場」夢多：加都係日場
「福祿壽」王祖藍、阮兆祥及李思捷前晚落區宣傳演唱會，談及會否加場時先搞個Gag當熱身，阮兆祥說：「係加都加日場，『夜場』夢多嘛！」
藝人王祖藍、阮兆祥及李思捷前晚到旺角，以快閃形式又唱又跳，宣傳3月8日舉行的《福祿壽十周年演唱會》。現場市民失驚無神有Show睇，反應就似門票銷情一樣熱烈！福祿壽施展渾身解數，圍觀市民睇到捧腹大笑！
祖藍早前在演唱會記者會中扮前特首扮到出神入化，早已被網友瘋狂洗版，由於表演太正，間接為他帶來「麻煩」，他說：「門票開售咗兩星期，銷情非常好，依家賣出咗一半以上，去到演出嗰陣應該爆晒！我自己都爭落好多『飛債』，要去撲飛！」阮兆祥則被問到會否考慮加場，以應付熱情粉絲需要，他發揮Gag王本色來回應：「我哋前面係Shine，後面係周杰倫嘅演唱會，睇吓周杰倫可唔可以讓位啦！不過係加都加日場，因為『夜場』夢多吖嘛！」
祖藍訓練有素 唔驚內地限翻拍
另外，祖藍在香港及內地人氣爆燈，被問到內地推出新指引，指若翻拍外國節目，需要預早兩個月提案，問到會否受影響？他說：「一向都冇咩大問題，之前拍嗰啲都播晒！傾緊新嘅內地真人騷，問題應該不大。其實有咩規矩多得過TVB？又唔可以扮政治人物，又唔可以過分，我係TVB訓練出嚟，上到去都係差唔多，而且我係做教育電視出身o架！」
文：影視組