龐景峰溜冰放閃幫女友着鞋
藝人錢小豪與郭秀雲兒子龐景峰（Andrew）不但功夫了得，亦是溜冰高手，日前他與拍拖一個月的圈外女友Peggy及兩名小朋友一起溜冰，Andrew細心為女友穿溜冰鞋，期間兩人溜冰時又情不自禁抱抱及錫錫，Sweet到漏！
Andrew日前與女友Peggy拍拖溜冰，見他相當細心，除替女友着溜冰鞋，又耐心地教她溜冰。Andrew自言兩歲已學溜冰，他說：「當年睇緊冬季奧運會，見到花式溜冰比賽，覺得啲人好似喺空中飛咁，好興奮想學，之後返到香港就報名學，6歲第一次比賽，攞咗金獎，我代表過香港去唔同國家參加亞洲冬運。到咗14歲，我要做決定，一係去英國讀寄宿學校，一係去美國接受專業溜冰訓練做職業選手，雖然我好鍾意溜冰，但冇諗過用嚟謀生，所以揀咗去英國讀書。」至於Peggy只玩過兩次溜冰，技術麻麻，但她是水上運動高手，強項是游水、跳水和韻律泳，曾經是韻律泳港隊成員。
第一印象好寸
談到拍拖，Andrew表示由朋友介紹認識，Peggy則對他第一印象麻麻，她說：「第一次見覺得佢好寸，同佢打招呼，佢唔騷我。有次搭車去活動，焗住要講嘢，佢成程車係咁講嘢，之後活動完咗佢問我係咪一齊食飯，就攞咗我電話，佢知我想去吓Event，有活動都會叫我一齊去，好好人。後來知道佢係明星個仔，覺得佢冇架子，加咗好多分。」Andrew解釋自己怕生保，故在陌生人面前較Cool。問到何時對Peggy有好感？他說：「隨緣，咁嚟到就嚟，相處好舒服。」
女友冇安全感
Peggy現時仍是大學生，間中會接模特兒工作。問到跟藝人拍拖會否感壓力？她說：「一開始唔想，前兩日我同佢講不如唔好一齊，因為我對佢唔係好有安全感，但佢畀好多信心我，佢好有交帶又黐身，但異性緣好好，係優點又係缺點。」Andrew也承認女性朋友比男性朋友多，但自認很專一！
文：名人組