惠英紅慘情影后打不死
出爐金馬影后惠英紅捧走第54屆金馬獎「最佳女主角」，唔只係為港爭光咁簡單，仲係為自己爭氣！現年57歲嘅佢，12歲喺夜總會跳舞打工搵錢，影過全裸露點寫真，患過抑鬱，試過服藥自殺，獲救後終於重新振作，女人50至咬緊牙關，喺一個極度講究青春與嫩口嘅香港娛樂圈入面，由低潮從頭爬番上嚟，嗰啲慘情經歷，真係不足為外人道，難怪紅姐上台領獎嗰陣話有啲暈，事關條命稍為冇咁硬淨，都已經向命運低頭認輸！
拍寫真嚇窒富商男友
惠英紅唔鍾意人嗌佢做「小紅」，事實上佢經歷過嘅人生高低跌宕，你叫聲「紅姐」，佢絕對受得起！睇番佢份CV：滿洲正黃旗人，屋企本來係大戶人家，因父親被騙財，變得家貧，有八兄弟姊妹的惠英紅，12歲喺夜總會跳舞幫補家計，後來雖被張徹導演發掘，拍戲做打女，拍咗5年戲，22歲就榮登第一屆香港電影金像獎「最佳女主角」寶座，但好睇唔好食，紅姐話：「跳舞賺千幾，拍戲反而賺五百！」咁都未算，80年代湧現一批靚樣女星，好似鍾楚紅、張曼玉、關之琳，個個行行企企談談情，就可以做女主角，酬勞又多，好似紅姐咁打生打死反而冇運行，試過由一年九部戲變冇工開，只好從頭開枱，日打夜打繼續做「打女」！
惠英紅曾經自封「技高運低魚腩紅」，佢真係冇講錯，仲要係喺麻雀枱以外，都係咁技高運低！紅姐27歲嗰年，諗住山不轉路轉，走去巴黎影本唯美全裸寫真集，等人知道打女原來都有女人味嘅一面，本來靚人靚景，成件事係冇問題，如果擺喺依家呢個年代嘅話！弊在紅姐走得太前，唔只收唔到預期嘅效果，更加引來排山倒海嘅負評，連富商男友都話要分手！
財色兼失自殺不遂
諗住The best is yet to come咩？點知跟手同細自己7年嘅黃子揚姊弟戀三年，不歡而散，紅姐直頭以「財色兼失」嚟形容呢段關係，可想而知有幾愛情重傷！事業愛情兩失意，搞到患上抑鬱，狂吞30粒安眠藥自殺，幸好被胞妹及時撞門，將已經嘔緊白泡嘅紅姐送院，死唔去嘅紅姐醒番，見屋企人圍喺病床邊哭哭啼啼，決心重新振作，走去無綫拍劇，Nuts哥有記者朋友日前至話，見紅姐捧影后真係好戥佢高興，事關好記得當年喺無綫啲宣傳活動上，大部分時間都冇人訪問佢，堂堂影后受到如此冷待，都咪話唔淒涼！
爭氣逆境轉勝利
但紅姐真係好嘢，佢話：「人一定要有自尊，但唔使放得太大！」結果佢嘅星運又真係畀佢拗得番起，由電視跳番入電影圈，仲事隔28年再做金像影后，遺憾嘅係哥哥惠天賜同惠媽媽之後喺四年內先後離世，雖然同至親陰陽相隔，專心事業嘅佢亦25年冇拍拖，但紅姐非一般嘅前半生，已經證明咗做人最緊要爭氣，先有望取得逆轉勝利！
Nuts哥