有「英國車神」之稱的一級方程式車手咸美頓（Lewis Hamilton），日前在Instagram上載與家人慶祝聖誕的短片，見其年幼姪仔穿上公主裙，他即對着鏡頭說：「我依家好唔開心，睇吓我個姪仔。」之後他問姪仔：「點解你要着公主裙？呢樣就係你得到嘅聖誕禮物？點解你想收到一條公主裙？男仔唔會着公主裙！」其姪仔聽後邊笑邊掩耳走開。
片段曝光後，即惹來各方批評！LGBT性小眾族群活躍分子Lisa Kelly在社交網留言：「咸美頓，你好令人羞恥！你姪仔唔值得被你或任何人公開羞辱。」反欺凌慈善組織Ditch the Label創辦人Liam Hackett亦留言：「令人失望就係，睇到擁有咁巨大平台嘅人，公開羞辱同試圖破壞一個小朋友。」更有網民及支持LGBT的人士，要求褫奪其MBE勳銜。
事後咸美頓知衰，刪除短片之餘，亦在社交網留言公開道歉：「尋日我同姪仔玩，我明白到我當時講嘅嘢係唔恰當，所以我刪咗Post。我冇惡意，唔係想冒犯任何人。我好開心姪仔覺得有表達自己嘅自由，就好似我哋所有人都應該咁樣。我鄭重為自己行為道歉……希望大家原諒我一時失誤。」