普通話「溝」唔掂 何傲兒錯失良緣
藝人何傲兒（Lily）對聖誕節十分重視，以往平安夜都會與家人到教堂，讀書時亦會跟同學到尖沙咀鬧巿唱聖詩報佳音，今年則希望可以親手煮一餐聖誕大餐給家人享用，她說：「近呢一個月突然有呢個想法，所以想趁聖誕節實行，因為平時會食爸爸媽媽煮嘅飯，但我真係冇試過煮一餐畀佢哋。」
雖然有心，但Lily曾被胞姊評為地獄廚神，她說：「我有一次炒燶蛋，加上又冇開抽油煙機，搞到間屋好似火燭咁，畀佢講到依家。（近半年去咗大陸拍嘢，廚藝進步咗？）我冇下廚，我最鍾意就係烚蛋。（咁你有信心煮畀屋企人食？）其實煮到熟唔難，只要唔好肚痛，好唔好食就見仁見智，我都有啲整西餐嘅經驗，不過太耐冇拍拖，所以冇乜點煮，以前拍拖有整嘢食畀另一半。（會唔會想過白色聖誕？）想，其實我試過聖誕去日本，但嗰次係去做嘢。喺咁凍嘅天氣，無論同邊個一齊都可以攬埋一舊，好Warm。」
拍拖唔分國籍
談到新一年的展望，Lily稱現時將焦點放在工作上：「過去半年都喺北京上堂同拍劇，希望新一年喺工作上有更多機會同更大突破。」感情方面，單身的她坦承恨拍拖：「一直都想，但要睇緣分，希望搵到個關心我、坦白同真心相愛嘅人。（你經常喺內地，接唔接受內地男？）冇諗過，不過以前有啲講普通話嘅男士想認識，但佢哋同我講嘢，我就僵硬咗，完全溝通唔到，我諗依家會好啲，應該聽得明，其實拍拖唔分國籍，最緊要相處到。」
場地：海港城
髮型：Dave Wong@IL COLPO Platinum
文：名人組