馬國明黃心穎 高調出巡放閃
藝人馬國明和黃心穎早前傳分手，但相戀兩年半的二人趁佳節親證情未變，高調出巡兼連睇兩片享受平民的浪漫，未有如以往般戴口罩拍拖的心穎，全程腰果眼冧望馬國明，睇西片《星球大戰》的二人，未知在平安夜可有另一場溫馨「戰役」呢？
馬國明和黃心穎早前突傳「掟煲」，指心穎難抵男友太「宅」，加上有富二代展開追求，而馬國明曾神回指「不結就分」，令外界以為此情危危乎，不過有片有真相，昨日被情侶視為重要佳節之一的平安夜，二人就被本報直擊拍拖睇戲直落，場面超溫馨。
昨午約五時，馬國明戴帽現身商場戲院樓層，身邊正是長髮、長裙、戴平光眼鏡作文青打扮的心穎，有別以往戴口罩拍拖的狀況。二人沒有十指緊扣，又相隔一個身位，但見心穎全程嘴角含春，又不時撥弄長髮，與馬國明有傾有講，還頻頻用心心眼望實男友送秋波，真是隔住鏡頭也感到二人有拖拍的喜悅。
拍拖AA制
二人經過戲院後，似乎趁電影未開場先到鄰近的家品店打發時間，閒逛幾分鐘後便步出。問馬國明是否平安夜跟心穎拍拖？他十問九不知，只說：「冇嘢，唔知。（係咪睇戲？）唔知呀！」而心穎則顯得頗避忌，自行彈開幾個身位，扮路人甲。之後二人快步離開，未知是否甜言蜜語講得太多，二人到咖啡店買飲品補充口水，一人一杯，並奉行AA制，各自掏腰包付款。
行經服裝店時，心穎細心挑選男裝，鍾情一件綠色V領開胸男裝毛衣，不足五分鐘便扑錘付款，免卻馬國明等到放蚊之苦，而最值得讚是「自己鍾意、自己畀錢」，陪買衫的男友不用多費心，心穎稱得上是「一百分女友」。到夠鐘睇戲時，二人一前一後入場，散場後便孖住歎日本菜，問馬國明可有送禮物給心穎，二人異口同聲冧爆說：「唔講得。」記者起哄叫馬國明拖實女友，他即一臉尷尬，但亦大方肩並肩企定合照，而投下閃爆眼的閃光彈後，二人再度入戲院睇另一齣戲，繼續在黑麻麻、不受騷擾的影院內享受多一次平安夜窩心的前奏。
文、攝：音樂組、追蹤組