「紅衫魚」胸壓阮政峰 戲假情真？

蘇韻姿翹實阮政峰，擺心心甫士放閃。

藝人蘇韻姿（Andrea）、阮政峰、劉丹、呂慧儀、羅樂林、單立文及林淑敏等昨日宣傳無綫處境劇《愛 ·回家之開心速遞》，飾演「紅衫魚」（熊心如）的Andrea孖住劇中有感情線的阮政峰，一同擺心形甫士，她更胸壓男方的手臂。雖然不慎露出黑色打底褲，仍無損Andrea的靚靚心情，事關她與政峰近日上載「愛的手勢舞」片段，二人不但勁合拍，跳到中段，政峰更錫了她一啖，她即冧冧豬甜笑，網民都表示被兩人閃爆！她對於是否戲假情真卻大賣關子，只問大家覺得她與政峰的合拍程度如何。

劉丹爆楊冪冇返港做冬

同場的劉丹化身聖誕老人搞氣氛，問到會否與孫女開Party？他說：「我聖誕要開工，孫女今年已經去咗兩個Party，屋企好多禮物！（新抱楊冪返港做冬？）冇，我個女都唔喺香港，劉愷威就喺度。（2018年先見到楊冪？）今年得番幾日咋喎，農曆新年會見到，佢應該返嚟香港！」

單立文（左二起）、劉丹、呂慧儀、羅樂林 一眾演員打扮得相當有聖誕氣氛。

蘇韻姿與小朋友打成一片，相處融洽。

此外，林淑敏憑着飾演大小姐龍力蓮入圍《萬千星輝頒獎典禮2017》「最佳女配角」，她說：「好開心入圍，但我睇好姚瑩瑩，佢喺《全職沒女》真係好麻甩，我有份拍《全》，但未見過佢真人係咁樣！或者一齊攞囉，唔知可唔可以咁呢？」

文：影視組