吳雨試玩志雲窒出火花

亞洲電視近日以OTT及手機apps形式強勢復活，明年1月29日正式開台，經典遊戲節目《百萬富翁》闊別12年後重生，由陳志雲主持的《百萬富翁2018》昨日在大埔亞視總台試廠，錄影廠布置與當年陳啟泰主持的版本類似，節目Logo及座位擺法九成似，遊戲玩法跟以往一樣，同樣有三個錦囊，亦設有兩條保險線，但第一條保險線由過去的八千元降至六千元，第二條保險線仍是六萬元，最高獎金一百萬港元。

為節目狂碌人情卡

亞視行政總裁吳雨昨日扮觀眾試玩，輕易答到「一千蚊題目」，其後跳到「一萬蚊題目」，吳雨答錯女性員工有多少星期產假，志雲即揶揄他貴為CEO竟然唔識答，又指他對女下屬冷漠，吳雨即指自己要顧大事，小問題交由人事部處理，火藥味十足！

事後志雲表示主持節目感覺刺激，並指不怕窒親吳雨：「老朋友唔會計較，佢（吳雨）轉頭唔記得啦！」他透露節目於1月2日開始錄影，一次錄三集，到1月29日晚上播出，頭幾集是藝人慈善版，又表示有碌人情卡請朋友，之後集數歡迎市民透過手機apps玩遊戲爭奪參與資格，海外人士亦可參加。問有否在家中練司儀稿？志雲笑言會突然唸唸有詞，嚇親家務助理：「我有狂睇唔同地方嘅主持點做，講對白啲節奏又要好準，以往陳啟泰真係做得好好！」

新版與舊版《百萬富翁》的錄影廠布置類似。

吳雨（左）扮觀眾試玩，答錯問題，即被志雲揶揄。

斥資逾千萬否認縮皮

吳雨透露買《百》版權連布景搭建斥資逾千萬元，各方面包括美術及音樂都要跟足原著遊戲生產商規矩，對方亦有派人監察，相當嚴謹！他指新一輯遊戲玩法大致跟過去一樣，但新增家庭觀眾透過手機apps一同參與，講到第一條保險線由八千元減至六千元，亞視否認「縮皮」：「係根據英國遊戲生產商要求，以前亞視嘅八千蚊係唔正確。」

此外，亞視大埔總台丟空多時，昨日所見大堂舊台徽模型及藝員相片已不見，吳雨表示「亞視復活」事務繁忙，令他大感頭痛：「長命抗戰呀！我初初嚟升降機都未整好呀！依家慢慢每樣做番好，整番升降機同埋廁所有廁紙用！」

文：影視組