楊千嬅受兒子啟發 喊住等開花
天后楊千嬅藉着第一個紅館倒數演唱會，分享與兒子Torres參加比賽的故事，看到兒子內心的傷感，千嬅難過得哭了出來，本以為幫兒子清除了心中的「垃圾」，意外地竟是Torres給她帶來啟發，讓千嬅領悟出為人父母的責任，喚醒她的「初心」做一個有意思的跨年演唱會！
楊千嬅首個聖誕跨年演唱會昨晚假紅館揭幕，以倒數「初心」來構思今次個唱，千嬅日前接受專訪時細訴今年5歲的兒子丁進諾（Torres）參加朗誦比賽的一段往事，令她頓悟到「初心」的真正意思，感性的她更忍不住哭起來。
自責為子報名朗誦
Torres在3、4歲大時，千嬅安排他以插班生報讀普通話班，3個月後有個朗誦中級比賽，老師表示可以讓Torres嘗試參加，她就代兒子報名，到比賽當日，本來信心十足的Torres面對人頭湧湧的環境，驚得不肯行出去，後來他終於企出去，但千嬅感覺到兒子很緊張，自責為兒子報名的她眼濕濕說：「我個心好唔舒服，想叫個仔唔好去，之後我出去陪佢企，拖住攬住佢，我個仔冇咁震，但依然好緊張，佢用氣聲背晒成首出嚟。」
千嬅坦言：「我唔驚面懵唔驚樣衰，你估我行出門口人哋唔講我咩？就算啲人話楊千嬅個仔咁驚嘅？我唔會介意，因為阿仔裏面最緊要。」所以她第一時間為Torres進行心理輔導，她說：「件事做得成唔成功唔重要，最緊要即刻幫佢清咗心裏面舊『垃圾』，否則積積埋埋就大件事，嗰時我唔知佢唔開心會擺咁耐，有次佢攞我部手機睇相，突然見到朗誦班小朋友攞住獎盃，佢就問我點解佢冇。」當時千嬅作古仔安慰兒子，又安排工人姐姐了解他的內心感受，才得知兒子有少少失落、Feel Sad（傷感）。
事隔一年，千嬅完全意想不到，剛讀小一的Torres有一日竟主動表示要報名參加朗誦比賽，她反而比兒子更大壓力，因為不想Torres再次不開心。但當她看到兒子大踏步衝出，鞠躬自我介紹後隨即高聲朗誦，千嬅激動得哭着說：「我個人呆咗，真係好感動，講起我都想喊，我睇過一篇文章講，每一個小朋友有自己嘅花期，幾時開花唔係一個問題，最重要係點樣令佢灌溉、陪佢開花，有啲人一世都唔會開花，因為佢係一棵樹。」
信任子女莫理閒言
從兒子這件事，千嬅領悟出為人父母要信任仔女，作為幕前人她清楚明白面對問題，以及壓力是甚麼一回事，她說：「呢件事係個仔幫我清咗啲嘢，幫助我今次開演唱會，我已經第七次開騷，但我唔記得咗我個仔呢道力，點解佢可以乜都唔驚，佢真係做到，如果當日佢就咁跌咗落去，我又鬧佢，傷害佢亦傷害緊自己。處理阿仔呢件事話畀我知，無論出面人講咩，只要做好準備就行出去，唔使諗到咁複雜，倒數番我個童年，人嗰道力好簡單。」此外，有傳千嬅、張惠妹等將參加內地新一季《歌手》比賽節目，但千嬅經理人否認其事。
文：音樂組