貪功架十足祖藍搵霆鋒寫揮春

藝人王祖藍與李亞男夫婦及葉家寶等，昨午到秀茂坪綵排晚上演出的聖誕音樂會，期間眾人食咖喱魚蛋醫肚。談到日前為謝霆鋒飲食節目擔任嘉賓，結果搞到「缺氧」，祖藍笑說：「整蠱霆鋒咋，飲食節目唔睇呢啲真係睇煮餸咩？雖然佢『功架十足』，我證明佢識煮嘢好味，今年搵到佢寫焦糖朱古力揮春就好嘞。」又指霆鋒全程請食牛鞭和牛睾丸：「佢擔心我唔得，畀人關心都係福氣嚟。」