龐景峰撻着學生妹當眾攬啜
郭秀雲兒子龐景峰與「清純栢芝」楊埕分手半年多已換畫，新歡是23歲的火辣學生妹Peggy。撻着僅兩星期的兩人早前拍拖往銅鑼灣Shopping，景峰做「阿四」提幾袋戰利品，熱戀中的他們旁若無人地當眾又攬又啜，相當癡纏！
27歲的龐景峰於2015年與曾參選港姐的楊埕撻着，二人拍拖兩年，至今年4月分手，甩拖半年多的景峰最近搭上一位火辣學生妹Peggy。日前下午，景峰與穿低胸衫及短裙的女友Peggy拍拖到銅鑼灣行街，他們以黑色情侶裝打扮現身，襯到絕。
媽咪讚乖女畀高分
兩人逛了一會已大有斬獲，景峰更不介意做「阿四」提着幾袋戰利品，期間搭扶手電梯時，Peggy突然擰轉身咀嘴男友，認真甜蜜。他們選購香水時，站在專櫃前的景峰，情到濃時伸手攬實女友的小蠻腰。之後二人食車仔麵醫肚，食了短短20分鐘便火速離開，男方負責埋單，其後雙雙到附近街頭截的士。
景峰昨日受訪時大方回應新戀情：「女朋友叫Peggy，係圈外人，佢今年23歲，我哋識咗兩個月，係去藝術展時朋友介紹認識，但拍咗拖只有兩個禮拜。佢以前係Part-time模特兒，依家喺香港讀緊大學，仲有一年畢業。（見咗家長未？）我哋嗰日之後去見媽咪。媽咪見到佢好開心，讚佢乖女、單純又孝順，家人畀好高分佢。」
文、攝：追蹤組