吳浩康企番上台 感觸爆喊

Deep前晚起在九展舉行一連兩場演唱會，頭場獲洪卓立、黃依汶及老公陳國坤等到場欣賞，全場爆滿。Deep除了彈琴、彈結他和打鼓，還大騷舞技，唱出《孩子王》等成名作後說：「我今年34歲，等咗今日34年！我由細到大得一樣嘢想做，唔係做歌手，係做歌星！歌手邊度唱都得，歌星一定要喺台上，所以我花幾多心力都一定要企番喺呢個台！」其後Yumiko穿短褲現身伴舞和獨唱《相對濕度》，Deep表示原本還想請Yumiko當年所屬的組合3T兩位成員蔣雅文（Mandy）與劉思惠：「但今日都有孖T，Mandy返咗香港。」他指Yumiko為自己做過多次嘉賓，大讚她有義氣，Yumiko就笑言前世欠了他很多，兩人跳唱快歌Medley掀高潮。

不捨同家姐分開

提到由一場加到兩場，Deep透露綵排時間緊迫，又自言唱錯了不少歌詞，但不想出貓，因為想唱得投入一點：「好多人叫我留聲，但我唔識，畀晒你哋！」他和音樂人陳思捷在台上重現網上直播的《Deep Nite Show》，感激對方欣賞自己，以及家人不離不棄，三個姊姊都有來捧場：「其中三家姐嫁咗去法國，今日都返咗嚟，我對佢嘅掛念有增無減，每一次送佢機，同佢分開都好似切咗我忽肉咁。」他表示會尊重及愛惜對方，更爆喊說：「多謝你返嚟睇我呢個衰仔。」Deep多謝在場的女友Michelle陪自己為直播東奔西跑，亦感謝大家出手處理門票問題。到握手時間，Deep走到台下與老闆楊受成擁抱時再度爆喊，楊生即拍他的膊頭。

吳浩康頻頻用紙巾拭淚。	吳浩康激動地攬着老闆楊受成。	楊受成與妻子陸小曼捧場。

感激楊受成信任

Encore時Deep說：「唔好以為大老闆唔需要同公司交代，佢面對好多同事對我嘅質疑，都始終對我充滿信任同支持。我可能曾經令佢好激心同失望，但同事都知佢好支持我、好錫我，我都知，多謝老闆！」最後他唱出《先入為主》，演唱會圓滿結束。

文：音樂組　

攝：張福宏