Stephy夠晒惡死 鬧走露體狂
性侵問題最近備受關注，鄧麗欣前晚出席首映時，自爆讀書時曾在屯門遇上露體狂，她大膽挺身而出鬧走露體狂後才識驚，慶幸沒有受到直接侵犯，事後亦有報警求助。
演員鄧麗欣（Stephy）、周秀娜、樂基兒及何傲兒等，前晚在九龍灣出席電影首映，Stephy與周秀娜不約而同以斜膊裝上陣，但笑言沒有夾過，可能是拍戲的默契，而最性感則是開胸晒「事業線」的樂基兒。
慶幸未受攻擊
最近性侵問題廣受關注，Stephy說：「呢套係女人戲，拍完都覺得好爽，好似為女性發聲，加上近排又有一啲女性嘅報道，希望藉住呢套戲為女性加油。」問到有冇遇過不快經歷？她說：「細個住屯門嗰陣有屯門色魔，有段時間放學好鍾意喺公園跟同學傾偈，試過有次撞到露體狂。由細到大我都唔怕死，好大膽，有啲正義感，當時同學好驚，我彈出嚟鬧走嗰個露體狂！佢揭開之後見到啲肉色，一堆嘢咁啦，第一下係驚，第二下就嬲，覺得好唔尊重，畀我鬧走咗佢！可能佢冇諗過我咁惡，佢都有啲驚，鬧完之後自己就識驚，後來好似有報警。好彩係見到，唔係直接嚟攻擊我。」周秀娜則未有不快經歷，但希望大家關注杜絕這些事情。
樂基兒打親人
至於樂基兒被問到老公可有前來捧場？她說：「冇呀，遲啲先約埋朋友一齊睇。（戲入面有性感演出，老公介唔介意？）其實都係少少，好似平時咁，做運動都會着Sport Bra，係健康嘅性感。」而她自評演出值100分：「好耐冇拍戲，呢套又係第一套打戲，我唔識睇中文呀！已經付出100%，所以會畀自己100分。（拍打戲有冇受傷？）喺戲入面成日都要畀人打，但冇受傷，反而我唔識就力，打親人！」
文：影視組