曹永廉打雀贏老婆
藝人黎耀祥、蕭正楠、曹永廉及黃浩然前晚參與無綫舉辦的《公公出埠》big big channel麻雀王大賽，蕭正楠與曹永廉先禮後兵，將對方所贈的手信穿上身，雖然曹永廉指打麻雀是他的專長，更口氣大笑指：「佢哋三個都會輸！」不過被黎耀祥寸他：「但係你都唔會贏！」蕭正楠更狠批他「無運」，笑爆全場！
蕭正楠被問可有與女友黃翠如的家人打牌？他說：「冇見過佢哋屋企人打，不過翠如有同我啲表弟妹打，諗住輸畀啲表弟妹當派利是，結果佢就食咗十三么，佢真係我運財童子！」他又爆料指曹永廉的太太是因為輸麻雀才嫁給他，曹永廉則解釋指是洪天明與太太稔熟，二人因打麻雀認識。
黎耀祥則透露小時候偷打麻雀：「同我兩個哥哥趁爸爸出咗去就偷打三人麻雀，結果有一次阿爸早咗返嚟，見到我哋就即刻攞藤條出嚟打！」被視為「魚腩」的黃浩然則直認已有廿多年無打麻雀。最後，由蕭正楠以2,200分奪冠、包尾的曹永廉只有1,736分。