謝安琪舉鐵跑步 激減廿磅苗條復工
天后謝安琪（Kay）宣布復工後昨晚首度公開現身，以全新短髮Look示人，表示與老公張繼聰舉鐵跑步，激減廿磅全面復工！提到囡囡唔識叫「媽咪」，Kay嬲爆呷老公醋，指前世情人魅力沒法擋！
久未露面的歌手謝安琪（Kay）昨晚出席聖誕亮燈活動，換了一頭短髮的她，身形比誕女後清減不少！Kay直言原定計劃明年中或年底推出新歌後才全面復工，但因為加盟麥浚龍（Juno）公司旗下的消息被本報踢爆後，獲得大量工作邀請，加快了步伐：「如果適合嘅就做住先，提早恢復狀態，所以都不停做運動，之前見到我都仲係肥嘟嘟，係靠做運動、控制飲食同埋意志去恢復狀態。（減咗幾多？）都有十幾廿磅，自己都鍾意咗做運動！（經常一家人做運動？）阿聰不嬲對運動都好有熱誠，佢都好開心，佢以前無敵是最寂寞，冇人陪佢，我哋依家就好似Gym Buddies，約埋一齊去舉鐵同跑步！」
唔簽Juno好似好衰
問到兩公婆都要工作，會否沒有時間湊女？Kay指Juno給她很大信心，讓她以家庭行先，亦對其工作無論在音樂或形象方面都很有想法，她笑言：「佢真係三顧草廬，嚟咗我度4、5次同我傾，佢真係好好，好到唔簽佢好衰咁，我老公都抗拒唔到佢嘅溫柔！」問到簽約費是否八位數？她沒有正面回應，只說條數非常難計。
唔擔心老公遭封殺
提到囡囡未懂得叫「媽咪」，Kay坦言用了很多方法都徒勞無功，笑言：「好嬲，我全職湊佢o架嘛，但係叫我都係叫爸爸，呢個前世情人嘅魅力，冇辦法！」談到張繼聰因經理人公司與無綫鬧官司而遭無綫封殺，Kay透露看報道前已聽過這個消息，亦收到很多前輩及朋友的慰問，更有朋友因擔心兩公婆的生計而介紹工作：「知道大家都好錫阿聰，大家唔使擔心，佢工作安排得好好。」
文：音樂組