現年25歲的美國人氣女歌手Selena Gomez月前驚爆靠老友Francia Raisa換腎保命，休養一排強勢回歸的她日前現身《Billboard Women In Music》頒獎禮，獲對方頒年度女性獎時即場爆喊，姊妹情感動全場。她另於訪問中大方承認翻撻Justin Bieber，無懼大晒真感情！
換上一頭金髮的Selena前日以露肩戰衣「胸襲」頒獎禮，性感露半球滿場飛，成全場焦點，而她更與月前為她捐腎的好友Francia攬頭攬頸留影，場面溫馨，對方後來孖住影星艾莉芬寧（Elle Fanning）上台向Selena頒發年度女性獎，Selena一開口講感言即淚崩，表示獎項應該由Francia獲得，因為對方救了自己一命，她邊抹眼淚邊講：「我感到無比幸運，講真我唔可能對依家嘅事業位置更加感恩，我想大家知道，我深深尊重（我所擁有的）平台！尤其今年，我想多謝我團隊與家人，因為佢哋同我共度好困難嘅時光。」
Selena又多謝以往的年度女性得獎者啟發大眾，後來又指住Francia表示：「我唔知點報答（你），或者我下年做隻正到不得了嘅大碟。」姊妹情動人，全場報以熱烈掌聲支持！至於人氣歌手Grace Vanderwaal於後台見到偶像Selena亦大為驚喜，真人騷出身的Grace又與名模評審Heidi Klum聚頭，密密留影。
雖然Selena在台上僅講好友避提男友，不過台下接受《Billboard》雜誌訪問就首度大方回應與The Weeknd結束10個月情後，火速翻撻Justin一事，更Sweet表示：「我珍惜影響我生命嘅人，或者之前發生過唔啱嘅事，但唔代表我對某人已經唔再關心。」The Weeknd近期於社交網Instagram清走所有有關Selena照片，但Selena受訪時仍堅稱二人再見亦是朋友：「我哋對對方只有祝福與關心，咁樣真係好了不起。」
文：外娛組