秋生嘴甜冧暈老婆
向來我行我素的影帝黃秋生，日前與老婆吳惠貞恩愛出巡，硬漢子秋生更化身暖男，與太太十指緊扣到中環眼科專科中心睇醫生，兩公婆全程黐到實，秋生更氹得太太不時笑咪咪。
有「火爆王」之稱的黃秋生，向來敢作敢言，經常在社交網發文抱打不平，雖然秋生外表霸氣十足，但對太太卻很溫柔，日前更化身暖男與太太吳惠貞拍拖出巡，十指緊扣現身中環睇眼科。約下午4時，戴黑色帽、穿黑色外套及牛仔褲的秋生與太太現身皇后大道中街頭，未幾進入了附近一幢商業大廈，搭（車立）往樓上的眼科診所。兩公婆於診所內形影不離，秋生全程傍住太太，兩人密密斟，氹得太太笑到見牙唔見眼。
電話貼眼先睇到
外表Cool爆的秋生，原來對住太太相當溫柔，同時亦有風趣一面，腳踏高踭鞋的太太全程緊貼着秋生，即使被人認出眼望望，秋生亦懶理途人目光，繼續同老婆甜蜜蜜放閃。未幾見兩公婆去櫃枱付款，期間秋生不停撳電話，不過見他要將電話放得好近雙眼才看得清楚，還睇到皺晒眉頭。秋生與職員有傾有講，最後親自簽卡找數，隨後見職員遞上一封信，秋生即場拆閱後便放回信封，之後拖住太太離開。
文、攝：追蹤組