黃智雯魔性大發勾男人

無綫熱播劇集《降魔的》口碑不錯，觀眾大讚馬國明演的士司機入型入格，黃智雯再演醫生，外表斯文，其實精彩畫面多多。

吊威吔盆骨痛

在劇集後段智雯成魔，改穿短裙、踩七吋高踭鞋吊威吔，半空中飛來飛去又有打戲，她直言起初會不習慣：「試過吊足六個鐘，由半夜吊到天光，加上要着好高嘅高踭鞋，飛到落地仲要好型咁企定！（有受傷？）撞瘀少不免，起初係好唔習慣，盆骨位喺吊威吔嗰陣夾到好痛！」

化身女魔的智雯，雖然着短裙上陣，造型卻不太性感，她說以眼神電死人：「可能我有跳舞底子，懂得用眼神去勾引人，我幾鍾意呢種勾引、挑逗男人嘅感覺！」談到現實生活，她的好姊妹胡杏兒已為人母、胡定欣在事業上更上一層樓，她可會羨慕二人？智雯說：「唔係羨慕，係好替佢哋開心，我又冇計劃結婚，呢個係個長遠嘅計劃，即使見到杏兒個BB，都冇衝動想去結婚同生仔，玩人哋個BB先啦！」

被胡定欣搞喊

至於定欣的成就，智雯直言大家只是見到定欣擁有的成果，忽略了她努力的過程：「佢會用過來人嘅身份同我傾，有次我出活動，佢Cap低咗啲報道Send畀我，叫我唔好重複着同一件衫，有需要啲咩衫可以同佢講，嗰陣我真係喊咗出嚟，好感動佢為我嘅事而操心！」

另外，《降魔的》明晚大結局，前晚繼續有人死，今次輪到蔣志光和劉佩玥，劇情催淚！在劇中一人分演「醫生」與「女魔」兩角的黃智雯，因「女魔」的角色假扮「醫生」騙馬國明去營救她，結果連累尾隨馬國明的劉佩玥在車尾廂慘被焗死，令馬國明再次激動落淚，誓要殺死「女魔」黃智雯！

文：影視組