Bob老婆補糧狂掃貨：鬼叫你生四件
育有四子女的藝人林盛斌（Bob），為了養家忙於工作，家庭重任則交給太太Pearl打理。日前Pearl到超市掃貨，將戰利品放滿一地影相並上載社交網，借意發文向老公呻「鬼叫你生咗四件」，叫Bob要努力工作，否則斷擔挑。
Bob與太太Pearl結婚後，九年內先後誕下三女一子，一家重擔由Bob肩負。作為全職家庭主婦的Pearl為了慳家，趁超市減價日瘋狂掃貨「補糧」，並將戰利品鋪滿地上，物件覆蓋三十多塊地版面積，相當震撼。
「會唔會有啲離地？」
Pearl在社交網留言：「今日（前日）對於各位靚太實在係全城盛事嘅開始！一早我已經去咗放血，返嚟Send咗呢張相畀林生，勉勵佢努力工作，鬼叫你生咗四件，仲一屋都係人！佢話：『去買野嘢買到咁，會唔會有啲離地？』」
相中見集合各種類型食物，包括8包豬扒、10盒雞柳、7包腸仔、6包烏冬、3盒牛扒等，連調味料也有10支，認真瘋狂。Bob除了養老婆及四小孩外，還要請家傭，難怪有網民笑言：「可能2個星期就食晒！」Pearl又上載與老公WhatsApp對話截圖，勉勵老公：「你要努力工作，四個斷擔挑。」
讚老婆持家有道
對於太太震撼掃貨，Bob接受電話訪問時表示：「老婆趁住減價同朋友一齊去掃貨，買嘅都係食物同日用品，全部用得着，唔會浪費，加埋都係幾千蚊。（生咗囝囝要加家用？）其實我唔知畀幾多家用，自己留少少，其他交晒畀老婆管理。」他又大讚老婆持家有道、知慳識儉：「拍拖送過名牌手袋畀佢，不過都唔係成日用，佢唔會為名牌瘋狂。」
文：專案組