吳若希直播嗲老公豪宅巨廳曝光!

歌手吳若希(Jinny)前晚出席《萬千星輝賀台慶》後,即刻急不及待回家睇囡囡。她在big big channel玩直播,令家中巨廳曝光,兩公婆又不斷打情罵俏,大晒恩愛。

直播開始時,Jinny甫入屋便狂問Alex是否掛住自己,還叫老公錫足她兩次。當Jinny叫Alex錫第三次時,Alex即刻用無奈眼神望住老婆。玩完錫錫,Jinny就問老公有否睇《台慶》,要老公講出她在騷內做了甚麼?Alex說:「唱歌,坐喺度,之後好似冇做嘢。」Jinny繼續追問:「我同邊個行紅地氈?」Alex答周柏豪,Jinny即刻話:「你都冇睇,唔好扮知。」二人不斷打情罵俏,網友忍不住留言話「好閃」;又有網友指Jinny叫柏豪做BB,Alex冇嬲,並話:「佢(Jinny)日日都叫我做BB。」認真大方!

愛女心切的Jinny之後衝入房睇囡囡,返出嚟即刻攬住老公話:「我個女真係『好打耳』!」冧完囡囡再向老公撒嬌,要老公再錫她,又問老公有否趁她不在家時「偷食」,Alex說:「我嗌咗消夜未食!」Jinny又扮喊說:「我喺屋企地位好低。」Alex即時嫌佢演技不夠好:「你都係唱番歌啦!」