黃佩霞玩立槳衝浪零難度
瑜伽導師黃佩霞性格好動，與從事外展訓練工作的外籍夫婿Ryan可謂最合拍夫妻，近日她隨老公學玩歐洲流行的SUP（Stand Up Paddle），立式單槳衝浪運動，她說此運動看似靜態，站在衝浪板上用單槳左右划，但原來少一點平衡力便會掉下水，由於她有瑜伽底子，故一試便上手。
黃佩霞說：「之前喺香港玩過一兩次，係最近去美國旅行先認真練習，玩時要用盡全身氣力、軸心力同平衡力，有啲初學者會跪喺板上玩，因為企喺度難度最高，我喺美國有個經驗，雖然湖面好平，但遇上對頭風，發覺扒嚟扒去都係原位，要用盡全身力氣先行到。如果喺香港海面玩，海面有浪，平衡技巧要更好，否則好易跌。」
她說在美國時，她與Ryan用衝浪板各自載着分別8歲和10歲的姪女，在湖面你追我逐，黃佩霞更穿上比堅尼大騷健美身材：「老公喺後面追我，想推我落湖，整蠱我，但推極都推唔郁我，連佢都讚我平衡得好好。（比堅尼好Fit？）其實有少少怕醜o架，但係鍾意着比堅尼，唔鍾意曬到一撻黑一撻白。呢個運動嘅好處係鍛煉到全身肌肉，特別腹肌。」