松岡李那等嫁戒蒲變宅女
來港發展已有七年的日模松岡李那，視這七年為人生轉捩點，由蒲精變宅女、由無肉不歡到戒肉，甚至近年踩過界從商發展紅酒及首飾生意，得着是世事常變，反而隨遇而安，機會自然來。雖說凡事隨緣，在破碎家庭長大的她，依然渴望組織家庭，並已「計劃」三年後結婚生子，新郎，不是林德信。
七年前隻身到香港發展的松岡李那，已視香港為第二個家。想起當日來港居住時，因言語和文化大不同，弄出不少笑話，同時因適應不來而谷到爆，一殼眼淚！松岡說：「依家識少少廣東話同國語，英文算係OK，當年嚟香港，去茶餐廳點餐或叫外賣都唔識講，當時英文好差，只聽得明What、Why、When、OK、Yes、Good呢啲單字，有次有人用Stupid鬧我，上網查先知話我笨！」
「因為溝通唔到，人生路不熟，當然唔開心，有時會谷到喊！我唔喜歡飲可樂，但嚟到香港飲咗好多，去快餐店叫餐，一定問我係咪要可樂，我唔識講仲有咩飲品，惟有照要！依家我識叫凍奶茶少甜、凍檸茶等等，學中文係由食物開始。我當咗香港係第二個家，未嚟之前我完全唔知香港喺邊度，呢個地方雖然細但乜都有！」
開始戒肉
喜愛夜蒲，是松岡昔日的生活，收工後和朋友喝酒談天紓壓是指定節目，現在已是宅女一名，連飲食及生活習慣也大不同。松岡說：「早排開始戒肉，唔係為減肥，而係緣分，媽媽都係影響我戒肉嘅因素之一。媽媽約5年前開始為流浪動物組織做義工兼收留貓狗，依家佢有8隻狗8隻貓，屋企好似動物農莊一樣！以前佢無肉不歡，但做咗義工後開始唔食。之後，我機緣巧合認識一個朋友，同佢傾開殺生問題，佢話：『如果畀把刀你殺隻牛，敢唔敢？』當我諗到呢幕，覺得好殘忍，我答佢話唔想，佢即反問我點解人要食牛殺生？」
嗜好多多
「自此我開始戒肉，但仍然都會食海鮮，但我唔會親自去劏去整。依家唔想成日出街，情願留喺屋企，睇電影、做Facial，依家嘅生活同心境好平靜，唔想飲咁多酒，酒，適可而止就可以。諗番以前，飲到醉晒，第日起身成個人好虛，踩住舊雲咁！依家只喜歡飲紅酒，最多飲一支！其實我好喜歡運動，瑜伽、高爾夫球、馬術、網球我全部都識，我喺東京有馬術牌！多嗜好多運動，你會覺得好實在，人生好精彩。早排反問自己人生目標係乜，但諗落世事常變，唔需要定死目標，隨遇而安就可以！好似你有一千蚊，好自然就想有一萬，跟住又會想有一千萬一樣，好多嘢會變，而你想要嘅嘢係無止境。」
不羈愛自由小時憎父母
習慣一個人生活的松岡，於日本廣島出生，十多歲已隻身到東京獨居，她笑說不羈放縱愛自由的作風是天生的，為了自由，天不怕地不怕，不靠父母去闖天下。「離開父母後，就算有幾困難都好，我半句都唔會講，從來唔會要佢哋幫，包括金錢等。我細個好曳，鍾意做乜就做乜，父母點講都唔聽，就算佢哋激到兜巴摑我，我一樣企硬！記得大約13歲開始，同父母關係好惡劣，我好憎佢哋，憎到有一至兩年係唔同佢哋講嘢！連學都唔願返，試過逃學，好憎老師！媽媽依然好有耐性，不斷主動同我傾、想教好我！依家大個咗，同媽媽關係唔同晒，佢早排先講笑，問我記唔記得以前『封口』呢件事！哈！」
松岡有個型爸爸！身為紋身師的松岡爸爸外表年輕及愛打扮，常被誤會是松岡男友！昔日視父親為怪獸的松岡，直言感情觀受他影響：人夫勿近！松岡說：「細個時好驚佢，佢係超級超級可怕嘅人，除咗鬼之外，我最驚係佢！長大咗，大家好似老友一樣，佢係全世界最有型同最正嘅男人！我喺破碎家庭長大，父母離婚，因為爸爸有外遇，所以我一定唔會揀人夫！至於之前話我要搵有錢男友，我冇講過！話我貪錢，我唔會嬲同介意，因為我根本唔係金錢至上嘅人，我係好定唔好？係咪對工作認真？同我合作嘅人或睇我作品嘅觀眾，一定會感受到。」
讚林德信值得信賴
至於與歌手林德信（Alex）多年來以「朋友」來形容，表面上緋聞多姿多采，已31歲的松岡依然單身，但已「計劃」34歲結婚生仔！松岡忍不住邊笑邊說：「18歲時已諗定34歲要結婚生仔，唔知點解，覺得呢個歲數係最好！如果真係嫁咗兼有B，都唔會話退出呢個圈，當然我會好錫BB，會以佢同老公為主，但諗落其實湊完仔餵完奶，都可以照做Model，影完可以返屋企繼續餵奶，哈！」
「Alex係好好嘅朋友、值得信賴嘅人，到依家我哋都係咁支持同信任對方。Alex好多地方值得學習，係佢影響我喺時間管理呢點做得更好！佢好守時、好識得分配時間，例如睇場9點半，佢就算之前有冇嘢做都好，都一定預早到場。」
踩過界學做生意
去年松岡終「衣錦榮歸」，受日本著名經理人公司賞職加盟旗下，當混血女神Leah Dizon師妹外，又跟日本兩大實力派演員中村雅俊、岩城滉一及日本性感女神藤原紀香合演電影。演藝事業版圖愈見擴大，松岡更踩過界從商，大搞首飾及紅酒生意。松岡說：「岩城滉一係爸爸嘅偶像，一知我同佢拍戲，開心到不得了！岩城同中村雖然年過六十，但佢哋好有型！中村拍戲期間會拎住結他唱歌畀大家聽，佢哋個個都好友善！反而最緊張係我要記超多對白，可以記到，都幾犀利！」
「好多香港人想喺日本買樓，因為我有朋友喺日本做地產，所以我好似中介咁介紹，又或者介紹日本人嚟香港買樓。依家我同爸爸女友個女，一齊打造首飾品牌，出年會推出全新系列。另外因為有朋友做紅酒生意，叫我幫手做顧問推廣，所以我又參與。哈！雖然我計數唔叻，但成日都做生意！多線發展，係覺得有機會就把握去做，有時你定咗目標，未必會做得到，反而隨緣，機會就不斷有！」
文：專案組
攝：劉斌
服裝：Snidel