馬國明爭獎平常心：唔會咁小學生

入行17年的馬國明向來形象健康、甚有觀眾緣，但就被視為接得最多「膠劇」的小生，觀眾都為他感到不值，雖然馬國明從未吐過苦水，但網民已於社交網齊齊為他伸冤。正值劇集《降魔的》熱播，此劇的劇本及馬國明的催淚演出，實在令人刮目相看，網民大讚故事情節感人、連續幾晚睇到喊，還熱推馬國明為今年台慶視帝最佳人選，以為穩奪視帝的王浩信遇到勁敵了！

「攞到會受寵若驚」

身在上海拍電影的馬國明受訪時坦言，很高興觀眾及網民喜歡《降》劇，對於大家力推他做視帝，他說：「對於演員嚟講，有觀眾嘅認同、鍾意套劇已經好開心，自己都做咗17年，不嬲獎項都係平常心，唔會話嗰一年套劇呼聲好高，就好想攞獎，嗰一年冇乜聲音，就唔開心，唔會咁小學生。每年都係平常心，而且全部都係好朋友，邊個攞都會戥人開心。」他指反而希望《降》劇可以奪得「最佳劇集」獎項，因為監製與編劇很用心寫了一個很好的劇本。問到過往哪一年覺得特別失望時，他說：「其實真係冇乜邊年失望，反而如果自己攞獎，會有啲受寵若驚，唔係好相信係自己咁！」

「好難接到好劇本」

說到網民戥他經常接「膠劇」而不值，馬國明坦言：「我記得黎耀祥曾經喺一個訪問度講過，佢演藝生涯入面，接到一個好劇本已好好彩，因為好難接到好劇本，如果你問我，好老實講，出道到依家17年，我自己遇到幾多個好劇本，真係一隻手數得晒。」他認為不論劇本好與壞，最重要是自己的心態：「好似套劇裏面好多前輩，你可以學吓嘢吸收吓，如果你接到唔係好好嘅劇本，但搵到嘢學，可以用得番，唔會係嘥嘅！自己用心做啦！得唔得就睇運氣、緣分，學齊咗所有嘢遇到好劇本就要把握同感恩。」而黃子恆於前晚一集《降魔的》與林凱恩親熱，期間露出爆肌身形，相當吸睛。

文：影視組