古天樂椎間盤移位痛到「罰企」

前晚藝人古天樂（古仔）、鄭嘉穎、鄧麗欣、張智霖、監製黃百鳴及導演林德祿等，到銅鑼灣出席新片《L風暴》煞科宴。早前拍戲導致右眼受傷的古仔又有新傷，他說：「我隻眼仲係唔可以睇太光嘅嘢，呢幾日仲有好嚴重感冒添，醫生又話我椎間盤移位，我坐同瞓都痛，唔知可以點瞓，惟有企！（減少工作量？）醫生叫我要休息，雖然我喺新西蘭嗰套電影嘅外景已經拍完，但我又要去馬來西亞拍另一套，仲有動作添，睇吓到時點啦！」

鄧麗欣肯大膽演出

嘉穎被問會否向電影公司推薦女友陳凱琳情侶檔拍戲，他說：「佢有拍電影，好多嘢做，有麝自然香，唔使我講！（無綫推『限奶令』，女友受惠，你最開心？）點解咁講？我對呢樣嘢冇特別感覺，希望唔好港姐着潛水衣啦！好期待睇吓出年港姐！（女友被投訴搭飛機登機時插隊？）我諗要分清楚特權同消費者權利，你買咩飛就有咩權益、有咩服務，呢個係航空公司決定，搞清楚先投訴！（戥女友無辜？）藝人係要經歷呢啲，經一事長一智！」

鄧麗欣與鄭嘉穎出席新片煞科宴。	鄭嘉穎	古天樂忍痛坐下影大合照，還展露笑容。

而鄧麗欣坦言已將發展重心放於影壇：「音樂上，我諗未必有新搞作，依家會擺多啲時間喺電影。（大膽演出？）可以，但底線係三點不露，唔會全裸，半裸只露背，又或者等年紀大啲先，到時冇乜所謂，亦都冇人搵我演裸露啦！」

另外，晚宴開始前，監製黃百鳴及導演林德祿透露正籌備開拍第四集，令台前幕後非常雀躍。

文：影視組