周麗淇冇期推Job損失慘重
近年主力在內地發展的周麗淇，夥拍孫儷及陳曉合演的內地劇吸引逾百億的網上點擊率，她更憑此劇贏得內地影視節「最佳女配角」獎項，但卻因檔期未能配合而推掉大量商演及廣告，她笑言不想計算損失。
女星周麗淇（Niki）、孫儷及陳曉等合演的內地劇集《那年花開月正圓》，播出以來收視及口碑甚佳，網上錄得過百億點擊，令一眾主角人氣急升，該劇更獲安排於無綫播放。劇中飾演「千紅」的Niki更剛於「第四屆橫店影視節」獲得「最佳女配角」。
打陳曉打到手腫
對於《那》劇如此受歡迎，Niki坦言意料不及：「當初知道點擊去到咁多時，心諗個數據係點？即係幾多人睇？好榮幸參與呢套劇，冇諗過香港有咁多人睇，孫儷同陳曉佢哋都想知廣東話版配成點，我都好期待。」談到與戲中演員均是首次合作，與孫儷演好姊妹的Niki大讚對方是好對手，二人各自專注投入角色，未有太多演技上的交流，反而戲外分享較多，她說：「大家嘅共同話題係養生同運動。（邊幕最深刻？）第一日開工打陳曉嗰場戲，打到我手又腫又痛，佢都冇反應，可能太瘦，我只係打到佢啲骨啦！」
拍拖會減產
談到角色為愛不惜一切，現實中的Niki笑言曾為愛情付出：「每個人為愛犧牲時間同工作，冇就唔叫愛情，愛情嚟嘅時候可能會懶啲，依家未有咪邊做邊等，有嘅時候可能減少啲工作，可能一年拍一套，其實我好享受呢幾年喺內地發展，但有同經理人傾拍完無綫劇《再創世紀》會休息吓。」對於《那》劇播出後，吸引不少商演及廣告邀請，惟因Niki的檔期未能配合而推掉，她無奈表示損失難以想像：「有同《再》劇監製講，我為咗佢錢都唔賺，加上我係要長時間代入角色，同一時間只能做一件事。《那》劇播出後的確係有好好質素嘅劇搵我，但好多廣告同商演都接唔到。（損失數字可以買樓？）哈！叫監製賠番畀我。」
文：影視組
化妝：Navi Lam
髮型：Deddy Kwan＠HAiR Salon
服裝：Burberry
場地：HAiR Salon