老公患肺癌 譚小環：所有生意我頂住！
藝人譚小環和從事保險的老公蔡強榮（Eric）結婚十載，近年兩夫婦專注打理食肆生意，但原來10月底Eric曾接受過肺癌手術，成功切除肺部的癌細胞並已出院在家休養，小環慶幸及早醫治：「不幸中大幸！」
小環老公蔡強榮（Eric）上周在其個人Facebook，上載一張身穿病人服和太太及醫生的合照，並撰文透露住院9天，接受完癌細胞切除手術，指手術順利並把肺部右下葉2cm細胞切除，惡細胞完全冇擴散迹象，化驗後確診為1A期肺癌，康復後不影響正常生活。他非常感恩能大步檻過，多謝太太及家人、朋友支持和鼓勵。Eric其後又再發文感激太太不眠不休的照顧，過程如坐過山車般，「來回地獄又折返人間」的一個月。
唔使化療 在家休養
昨日小環與歌手林奕匡、狄以達及范振鋒等出席新城活動，她首度談及老公Eric病情：「佢身體上嘅病其實已經好番晒，好彩佢有去定期檢查身體，發現嗰時係肺癌一期最初，兩個星期前已經做咗手術，唔使電療同化療，依家手術後好得七七八八，已經出咗院返咗屋企休養，咁自己都好安慰，好幸運遇上一個好醫生。」小環稱老公現已戒掉吸煙的壞習慣：「其實都想佢戒好耐，咁依家為健康更加要戒啦，佢屋企休養緊唔想佢太操勞，所有店嘅生意都有我頂住喇！我比較捱得。」
無意生B 享受人生
問到可有發現老公任何病徵？小環說：「因為佢發燒、傷風同感冒，醫生朋友都叫佢不如穩陣啲去檢查吓，所以就驗到出嚟，呢一個月我講得最多嗰五個字係『不幸中大幸』！」小環承認得知老公患病時好擔心：「尤其未知驗出嚟結果前，所以依家首要我係要增肥，瘦咗8至10磅，要去多啲旅行，唔可以太緊張，要放鬆吓腳步，健康第一，第二先係搵錢。」問到兩人可有計劃生小朋友？她說：「就算老公冇呢個病之前，大家都決定唔生小朋友，我哋已經有個三歲嘅『囡囡』就係隻貴婦狗。」
同場的林奕匡（Phil）稱因家人在加拿大開餐館，自小打爛過無數碗碟，試過茶壺跌下時用腳來接住，問到可會繼承家業開餐館？Phil說：「唔會啦，飲食生意唔易做，香港就更難，我決定做歌手，就唔可以三心兩意。」
文：音樂組
攝：劉智源