柏豪被鬧亂泊車 阻塞交通

「男神」周柏豪特別惹是非，早年曾被網民譏做「大文豪」的他，昨日揸住「搶眼球」白色新辣跑在佐敦被網民捕獲，更將他的辣跑照上載到討論區，留言：「有冇人識周柏豪？快啲叫佢返嚟揸走部車」。從照片所見，柏豪的跑車停泊在路邊，疑似阻塞後面一架旅遊大巴轉彎，隨即引來網友圍插狂轟：「人泊車佢泊車，泊得咁衰，報警幫佢再出名啲啦！」還揶揄柏豪人如其名周圍泊，笑稱他是「周泊豪」。

網友稱車內冇人

柏豪昨日回覆本報查問，本來不欲回應，只說：「我覺得冇乜好回應，因為冇事發生。」其後再解釋：「其實我當時喺架車度，我睇住嗰一個人影相，我泊嗰度係上落客位，嗰度唔係雙黃線，係停得車o架，當時架旅遊巴都係上落緊客。（你停咗幾耐？）冇計喎，總之架旅遊巴之後都開走咗。」對於被網民轟「自私」泊車，柏豪不怒反笑說：「網上嘅事有時唔需要太認真，咪當笑料一則，大家輕鬆吓！（覺唔覺得被人針對？）其實幾開心呀，人哋見到我架車影出嚟，嗰個人開心咪得囉。」

雖然柏豪已作解釋，但有網民直斥他：「做得明星就唔好講大話啦！真係唔篤爆你都唔得囉！」該網民聲稱事發時，其座駕泊在柏豪的車前面，他指柏豪泊低車後就跟一位女性友人步向前面的商場，五分鐘後旅遊巴才到，因為轉不到彎，旅遊巴都「呠」了五分鐘，因此該網民才落車影相，他還走近柏豪的車望，肯定車內沒有人，雖然最終旅遊巴駛走了，但該網民說：「佢泊車嘅位置係有單黃線，唔係酒店落客位。」對於被斥「講大話」，柏豪的經理人說：「真係冇嘢需要回應。」

遭「花生友」惡搞

雖然有網民鬧爆，不過亦有人撐柏豪，認為是旅遊巴司機技術問題，因為睇位是足夠轉彎，亦有網民上載柏豪扭耳仔扁嘴相代他道歉：「我知錯啦，唔好再Comment啦」，不過大部分都是「花生友」，藉柏豪被人「公審」之際，發揮創意搞笑一番：「周柏豪：其實我喺旅遊巴裏面」，又拿其主演劇集《使徒行者2》劇情來玩：「佢喺泰國跟緊覃歡喜搵食」、「叫卓Sir搵佢會快啲」，非常爆笑！

文：音樂組