農夫作禁歌數港女 女歌手縮沙罷唱
組合農夫前晚舉行演唱會，施展渾身解數Rap盡全場，更碌盡人情卡，獲陳奕迅、黃子華及鄭裕玲（嘟姐）等拍片打氣。全晚亮點落在農夫首次公開獻唱「禁歌」，皆因歌詞數盡港女的「缺點」，該曲最後胎死腹中，更嚇到原本合唱的女歌手臨時縮沙！
農夫前晚在麥花臣場館舉行一連六場演唱會的頭場演出，開騷前，C君與陸永在台上邊Set頭邊與歌迷傾偈。正式開騷時，DJ Tommy現身打碟，農夫在舞台兩邊Rap住出場，並走到觀眾席與歌迷近距離接觸。兩人全晚大晒饒舌功架，並邀請到本地Rapper，包括Heyo、JYD及Double T齊齊上台Rap。
中英夾雜又拜金
農夫透露之前構思了一首以港男鬧港女為題材的「禁歌」《港女收港男皮》，並邀請了一位女歌手合作，由於歌詞太具攻擊性，對方不敢唱，令該曲胎死腹中，但他們破例在演唱會獻唱。歌詞將港女標籤為「拜金」，當中有「奉旨靠男人，你係咪天生植物人」、「一句說話有幾個英文，用又用得核突，成日although又but」等歌詞，寸盡港女各種「缺點」。不過，歌曲後半部其實亦有以港女角度出發，「數臭」港男只懂打機、斤斤計較及欠缺上進心，全場歌迷聽到站起歡呼尖叫！
農夫今次開騷獲陳奕迅、黃子華及嘟姐拍片支持，子華將農夫比喻為喉糖和消炎藥，為歌迷的生活帶來治愈。嘟姐則笑言初次見到農夫時覺得他們根本不似歌手：「第一次見到佢哋好核突，仲企喺我隔籬，心諗咩人嚟？人哋話畀我聽佢哋係歌手，『歌手？乜香港淪落到呢個地步呀？』」但她坦言相處後覺得三人一拍即合，更起了化學作用，大讚農夫有文采！農夫最後唱出《456Wing》為演唱會畫上句號，兩人更親自走到出口，歡送歌迷離開。
爛桃花有手尾跟
受訪時，問到原本合唱「禁歌」的女歌手是誰？農夫說：「唔好講啦，首歌都冇出！佢嘅選擇可能係啱嘅，因為啲歌詞都幾激，或者佢好想唱，但公司覺得唔啱呢！」C君在台上表示推出《好彩分手》時，收到舊愛的訊息，問到是否與林珊珊女兒李澄有關？他立即否認：「唔係！好耐喇！」陸永則笑說：「你哋唔識o架嗰個，係出面嗰啲爛桃花嚟嘅！」
文：音樂組
攝：張福宏