陳庭欣為拍檔歌喉平反
伍允龍在廟街扮「走音歌王」遭投訴，同劇的陳庭欣（Toby）笑謂：「佢平日好鍾意哼歌，我都係拍呢套戲先知佢咁熱愛音樂，但絕對唔係難聽嗰啲，佢因應劇情先扮走音，扮到畀人投訴即係好入戲啦！其實廟街本身都好嘈，點投訴呀？」Toby又指出英國外景時，住在對面房的伍允龍經常開大音響：「早知係咁，我都去投訴佢嘈住我先得。」
至於同樣有份演出該劇的江嘉敏則表示：「我同伍允龍好少同場，唔清楚佢要喺劇中唱歌。我角色唔需要（唱歌），但有學緊，真係要唱都等我練好啲歌先啦，費事出騷嗰陣畀人報警拉我，哈哈！」