肥媽黑妹棟篤唱 歎完先開騷

情如親姊妹的肥媽和黑妹，首度一齊開騷，黑妹稱原本檔期是她和Joe Junior，但因對方健康問題，所以便邀肥媽合作。肥媽說：「我舊年講過退休，咁即係叫我自打嘴巴！群星我就唔會唱，但我老公就話幫吓黑妹啦，咁我就諗『棟篤唱』未做過，一半棟篤笑，一半唱，咁都有新意又好玩，香港人最緊要正能量同開心。」

爆黑妹收兵

肥媽和黑妹說話都直腸直肚，抵死搞笑，兩人笑言單是分享生活經歷，4小時都講不完，何況還要唱歌？暫時選了60首歌再篩選，並透露農夫、阮兆祥、陸浩明和羅敏莊擔任嘉賓，Rundown都有排諗。兩人希望每個觀眾入場都笑得開懷：「我哋有幾個朋友要送定尿片畀佢，怕佢哋笑到瀨尿！」問到會否在台上互爆瘀事？黑妹稱：「慣啦，佢對住鏡頭就爆我啲嘢。」肥媽即說：「追佢嘅人嚟自世界各地，諗住佢哋嚟就安排四面台分開坐，唔好一齊坐，咁你對住邊個方向唱情歌，佢哋都會覺得你對住佢唱。（肥媽見過你啲『兵』？）見過兩個，仲有四個未見。」

肥媽作狀勒住黑妹，黑妹交足戲扮斷氣。

黑妹被肥媽踢爆有很多觀音兵。

玩空中瑜伽

問到演唱會只開兩場可夠喉？兩人坦言已獲邀到外地演出，但肥媽稱半退狀態，黑妹亦表示要減少工作多陪家人，並指會去泰國打高爾夫球。演唱會即將舉行仍去玩樂？肥媽笑稱：「我哋演唱會唔使咁多準備，我哋喺外地演唱都係朝早打波，夜晚咪開演唱會囉。」黑妹亦稱：「我都係啱啱喺加拿大返嚟，去5日唱咗3場，打咗3場波。」這對「高球雙妹嘜」對空中瑜伽甚感興趣，更請Miss教她們擺甫士拍攝，十分搞笑。

文：音樂組

攝：吳文聰

場地：Elite Fitness & Beauty