張晉超能搞笑氹囡囡開心
身手了得的張晉在新片由水面打到落水底，雖然擁有武術運動員的超級體能，但在水底拍攝仍感吃力，在伸手不見五指的混濁水中演戲，每次都面臨溺水危機。他坦言想嘗試武打片以外的戲種，恨演喜劇及擁超能力角色，讓女兒睇完笑餐飽。
動作影星張晉在新片《狂獸》與余文樂拍攝多場水中打鬥戲，除了體力消耗超乎想像，在深達9米的混濁水中，更令他每刻面臨死亡威脅：「水底戲係要喺 玻璃缸拍，需要帶住氧氣筒先落到水底，放開氧氣筒後每一Take最多拍到幾十秒，本身閉氣都有難度，仲要係有動作戲，戴埋眼罩只見到一點光。（比想像中難？）的確係，有好多水中掙扎場面要吐好多泡泡，都畀導演投訴唔夠泡，但一口氣吐晒，我就冇氣上番水！當一Cut機，你係摸到乜就塞入口，咬住個氧氣掣，再由潛水教練帶你慢慢上番水。」
老婆支持
問到太太蔡少芬有否投訴？張晉表示：「有同佢溝通，佢都好明白，繼續用自己方式支持我。」雖然得到太太體恤，但張晉拍攝不少「兒童不宜」的暴力美學作品，兩位囡囡都無緣欣賞爹哋演出。問到女兒會否對他的工作感好奇？他笑言：「會o架，佢哋會睇卡通片，我咪同佢哋講爸爸係演英雄，係做好人。（恨演戲畀囡囡睇？）我都想演啲識超能力角色畀佢哋開心嘅，或者演喜劇，始終係演員，每一種戲都想嘗試。」
呷醋外父
講到太太蔡少芬早前指囡囡受男同學歡迎，張晉笑言：「冇計，因為個女太靚！我第一時間用朋友身份問佢。（將來識男朋友，你呢關應該好難過？）都會，因為我都係男人，知啲男人諗乜，依家我做住佢哋男朋友先，應該冇人搶得走！」
場地：Studio King
髮型：Eve Wong＠Hair Corner
化妝：翁嘉齊
服裝：Koyo
文：影視組
攝：張福宏