楊玳詩走出自卑助人
英皇集團老闆楊受成博士二女兒楊玳詩，因愛女患上羊癇症而一度崩潰、自卑，她為此發起義賣活動，以過來人身份鼓勵及幫助有需要的人。
從事金融業的楊玳詩（Daisy）育有13歲女兒Meagan，予人女強人感覺的她透露，因女兒3歲至8歲幾時患有羊癇症而晴天霹靂，她說：「佢抽筋就冇咗知覺，一行就跌，係頭落地先，似熄咗機，要等幾分鐘先會醒，每月有十零日會係咁。」她回想當時情況即眼濕濕：「佢3歲幾時抽筋撞咗埋枱角，下巴穿咗，成條毛巾都係血，連牙都歪，當時我崩潰，好痛苦。佢一抽筋，我攬住佢，佢反晒眼，一路震又硬晒，根本冇嘢做得到。」進出醫院次數多到數不清，星期六、日都是去醫院試新藥。
飽受壓力冇人知
Daisy透露女兒讀幼稚園時，因要工人攬住上堂而冇朋友，直到一年班不可以有工人在課室，要工人在門口望住女兒，小息扶女兒去廁所，令Daisy更覺自卑：「我唔想個女自卑、冇朋友，但當時校長話係我自卑，點解唔畀人知你個女要工人喺身邊，咁佢真係唔舒服，校長仲要話畀學生知羊癇症，如果身邊有同學咁樣要點做呀，最後變成一個教育。」她才恍然大悟。其後女兒9歲時康復後，轉為幫助其他小朋友，而Daisy每次見到病童家長，都想起自身經歷：「好多人都會攬小朋友叫佢唔好驚，但我會攬住父母，叫佢哋唔好驚，父母壓力冇人知道，我感同身受。」
Toby做善事做到喊
Daisy已經是第三年發起英皇證券集團慈善義賣活動，更找容祖兒及張敬軒等幫手畫T-shirt籌款，希望籌得超過100萬。今次並找來梁靖琪（Toby）合作，Toby說：「想帶訊息畀下一代，因小朋友太易得到玩具同電話，我每次做慈善都會喊。」活動由11月24日至12月3日舉行，受惠機構是「生命小戰士會」，部分善款捐給「香港導盲犬服務中心」。
文：名人組