宅男女神大解放 龔嘉欣過咀癮 李佳芯摸慣肌男
出爐新加坡視后李佳芯（Ali）及龔嘉欣（Katy）昨日到東港城出席活動，與大公仔合照拾回童真。兩人透露在台慶劇《誇世代》都有突破演出，Ali將與陳豪玩SM，更摸勻三大肌男，但笑言不會逼男友操肌。至於Katy亦有色誘戲，除與森美跳貼身舞外，更奪走胡鴻鈞的螢幕初吻。
李佳芯和龔嘉欣昨日到將軍澳出席《東港城 x miffy與你雪地迎聖誕》活動，與大公仔及現場多個聖誕場景合照，新鴻基地產代理有限公司租務部總經理鍾秀蓮預先送上聖誕禮物給兩位宅男女神，又預祝兩人生日，吸引大批市民圍觀。
唔逼男友操肌
早前接受子宮囊腫切除手術的Ali精神奕奕，並穿上有踭鞋，她表示身體已康復不少，講到昨晚在台慶劇《誇世代》出場，她笑言一出場就叫陳豪除衫及摸他，並預告之後有床戲：「仲有虐待，SM嗰隻，睇我個樣就知我一定係S啦！我又會SM胡鴻鈞，佢係絕對的M，好好笑，有好多大家估唔到嘅場面。」Ali又表示跟劇中三名大隻仔張繼聰、陳豪及森美都有對手戲，問會否叫男友陳炳銓也練大隻？她說：「工作上我都摸慣，不外如是啫！雖然我摸上癮……至於身邊朋友有自己選擇同性格，唔會逼佢。」
自認喜歡儲公仔的Katy對現場可愛布置愛不釋手，猶如變回小朋友一樣到處參觀。而她同樣有份演《誇》劇，更有不少刺激色誘戲份：「有場戲同森美跳辣身舞，佢好似柱咁，我圍住佢嚟轉，我仲拎咗胡鴻鈞螢幕初吻，唔係蜻蜓點水咁簡單，拍咗10個Take，場戲幾好Feel。」
盼冧莊女配角
講到胡鴻鈞與許廷鏗傳斷背，Katy笑言：「Feel唔到喎！（同你咀完就轉取向？）我都係筍盤嚟o架！」又指今次角色有突破，問到有否信心如去年《幕後玩家》般大回響？她說：「希望有得冧莊（女配角獎），我同姚子羚會放晒啲獎喺屋企，有鼓勵作用，每朝都會望吓。」而《誇》劇周一首播24小時跨平台總收視25.2點，約164萬觀眾收看。
文：影視組