陳展鵬被爆多女友 鮑起靜催生B

胡定欣（右）和姚子羚希望在下套劇集飾演姊妹。

藝人陳展鵬、鮑起靜、胡定欣、姚子羚、陳山聰與江美儀等，前晚到尖沙咀出席劇集《同盟》飯局。鮑起靜表示見劇集在《星和無綫電視大獎2017》中成績好，加上自己因拍戲缺席宣傳，故特意約食飯慰勞一班台前幕後，她說：「去台灣拍咗兩個幾月電影，再去冰島幫孫燕姿拍MV，平時好難得去冰島，當然要答應啦，總共去咗六日。」

問可有機會開續集？與鮑起靜「母子情深」的展鵬笑言：「要睇阿媽同監製！（落嘴頭說服阿媽？）佢都想再拍嘅。」問到鮑起靜會否想展鵬帶埋女友一齊拍？她笑言：「佢好多女友喎！（現任女友單文柔呢？）我未見過喎。」展鵬聞言笑說：「一陣手機開畀你睇啦！（幾時公開拍拖？）想低調啲，阿媽知我有分寸。」鮑起靜即跳一步直接催生B：「我想抱孫添呀！愈快愈好！」

鮑起靜搞笑指陳展鵬有好多女友。

一班《同盟》台前幕後食飯慶祝在星和頒獎禮中有好成績。

定欣自爆烏龍事

同場的定欣與子羚亦希望再與鮑起靜合作，笑言已約好下次要飾演鮑起靜兩個女，講到「胡說八道會」一班好姊妹日前為胡杏兒慶祝生日，問到下一位壽星女是誰？子羚說：「下次輪到豹嫂（胡蓓蔚），然後就到我，諗住一齊慶祝！（婚期先定生日先？）生日日子就一早定好咗嘅！」定欣則自爆將訊息傳錯群組，令生日驚喜「穿煲」。

文：影視組