累胡鴻鈞許廷鏗再傳緋聞 吳若希開枱放飛機趕返家餵奶
胡鴻鈞與許廷鏗的「戀情」再被翻炒，吳若希自認是「幕後黑手」，原本約了二人打麻雀，但因照顧愛女爽約，導致二人再傳緋聞，並直認一度懷疑他們的關係！
歌手吳若希（Jinny）、胡鴻鈞（Hubert）、林欣彤與組合Super Girls等，昨日到尖沙咀出席《星光熠熠耀保良》記者會，Jinny透露將與好友Hubert同台演出，不過男方笑言不想合唱，Jinny聞言即說：「合唱啦！再唔合唱又話你有同性密友喇！」Hubert則稱：「咁我同性異性都有好多密友。」
一度懷疑斷背
對於Hubert與許廷鏗的「HeHe情」再度炒熱，Jinny直言曾懷疑二人關係：「喺我角度睇，佢兩個係Friend到有一刻我都懷疑有超乎友誼嘅關係。」她又自爆因「放飛機」，令他們再傳緋聞：「其實佢哋係約打麻雀，都有約埋我o架，不過臨時個女半夜起身要食奶，我做完嘢就直奔屋企。」
Hubert被問與許廷鏗是否有機會發展？他笑言：「可以由朋友發展做更好嘅朋友。（係咪你杯茶？）好朋友嘅一杯茶，係可以互相分享心事同畀力量嘅好戰友。（避約許廷鏗？）唔使，呢啲傳言都幾無謂，喺呢個圈交到真心朋友好難。」
許廷鏗：得啖笑
另外，許廷鏗前晚出席活動時，大方談「斷背」傳聞：「得啖笑，我哋係去朋友屋企打牌，唔係得我哋兩個，打牌坐底都要四隻腳，嗰度係我哋圈外朋友嘅地方，唔想影響到人哋。我同Hubert係好friend，但唔使問都知唔係『HeHe』情，係正常社交。」
文：影視組